09/02/2013 09:57:47

Specialistët shpëtojnë vlerat historike të Afreskut të Onufrit

Instituti i Monumenteve të Kulturës po shpëton katër figura me vlera unike, i pikturuar nga Onufri në vitin 1554

TIRANË - Katër figura, nga copat e mbetura të afreskut në Kishën e Shën e Premtes në Elbasan, pas dëmtimit të tij, tashmë janë arritur të kompozohen sërish.

Specialistët e Institutit të Monumenteve të Kulturës kanë shpëtuar vetë katër figura ndërkohë që pritet të shpëtohet rreth 30% e afreskut, me vlera unike, i pikturuar nga Onufri në vitin 1554.

Krahas realizimit të 4 figurave, specialistët do të vazhdojnë punën për realizimin e afreskut, pasi disa figura të kompozuara janë të përgjysmuara, sepse pjesa tjeter ka mbetur ne kishë.

Ndonëse janë vetëm pak copëza që kanë mbetur prej sipërfaqes së tij, për specialistët, kjo mbetet një sfidë. Këta të fundit, shprehen se afresket janë dëmtuar në një masë të madhe, çka përbën vështirësi për të bashkuar pjesët e mbetura.

Ky afresk u dëmtua pak kohë më parë dhe pjesë të mëdha afresku të thërrmuara u gjendën në tokë dhe pjesë të tjera mungonin fare. Afresku 460 vjeçar i pikturuar nga Onufri u dëmtua në një sipërfaqe prej 3.2 metrash katrorë.Prej gjysëm shekulli Kisha e Shën e Premtes në Valsh të Elbasanit është shpallur Monument Kulture.

HermesNews - ©2013

Dërgo me email | Stampo artikullin