05/02/2013 13:21:06

Një i arrestuar pas shpërthimit në veri të vendit

Gjatë realizimit të kontrollit në shtëpinë e të dyshuarit është sekuestruar një granatë dore, tip M-75 prodhim jugosllav, dy karikatorë të armës automatike me 50 fishekë, të kalibrit 7.62 mm

PRISHTINË - Një i dyshuar i përkatësisë etnike serbe u ndalua nga policia e Kosovës, pas rastit të shpërthimit të mbrëmshëm në veri të Mitrovicës, ku u raportua se u plagosën dy fëmijë serbë.

“I dyshuari jeton së bashku me familjen e tij në katin e parë të shtëpisë ku ka ndodhur shpërthimi”, njoftojnë burimet zyrtare të Policisë së Kosovës.

Sipas policisë "dy familjet banuese në shtëpinë dykatëshe nuk kishin marrëdhënie të mira fqinjësore...Gjatë realizimit të kontrollit në shtëpinë e të dyshuarit është sekuestruar një granatë dore, tip M-75 prodhim jugosllav, dy karikatorë të armës automatike me 50 fishekë, të kalibrit 7.62 mm, etj. Ndaj të dyshuarit të arrestuar, me autorizim të prokurorit të shtetit, është caktuar masa e ndalimit policor deri në 48 orë, për vazhdim të procedurave të mëtejshme hetimore”, thuhet në njoftimin e sotëm në faqen zyrtare të Policisë së Kosovës.

Dy fëmijë janë lënduar si pasojë e një shpërthimi që u regjistrua në orët e mbrëmjes, më saktësisht rreth orës 18:45, në rrugën “Bore Stankoviq”, përkatësisht në Lagjen e Boshnjakëve, në veri të Mitrovicës.

HermesNews - ©2013

Dërgo me email | Stampo artikullin