05/02/2013 12:55:03

Rikonstrukturohet Xhamia e Mbretit

Inspektori i punimeve, Enver Camorri, thote se 'për rikonstruksionin e xhamisë është ruajtur origjinaliteti i saj ndërtuar në shekullin e XV në periudhën e pushtimit otoman, ndersa materialet e punimit janë marrë nga mali i Sopotit në Librazhd'

ELBASAN - Në fund të muajit shkurt pritet të finalizohet rikonstruksioni i Xhamisë Mbret, objekt kulti që ndodhet brenda lagjes “ Kala” ne Elbasan. Ky investim po realizohet me kontributin e besimtarëve muslimanë dhe është miratuar nga Instituti i Monumenteve të Kulturës.

Inspektori i punimeve, Enver Camorri, thote se “për rikonstruksionin e xhamisë është ruajtur origjinaliteti i saj ndërtuar në shekullin e XV në periudhën e pushtimit otoman, ndersa materialet e punimit janë marrë nga mali i Sopotit në Librazhd”.

Ky objekt do t'i shërbejë besimtarëve, por edhe qytetit dhe turistëve të cilët janë të shumtë që e vizitojnë atë. Aktualisht po punohet për rikonstruksionin e minaresë dhe po ruhet ndërtimi i vjetër i xhamisë.

Xhamia Mbret është ndërtuar në fund të shekullit XV-të dhe përfaqëson tipin e faltores me sallë të mbushur me çati druri dhe hajat përpara hyrjes. Salla e faltores ka një hapësirë relativisht të madhe.

Tërthor aksit të saj, ndodhen tri kolona druri për arsye konstruktive të mbajtjes së çatisë dhe për të krijuar një mjedis ndarës të sallës nga pjesa e mafilit, të cilat janë karakteristike për këtë lloj kompozimi të faltoreve të hershme islamike.

Prapa kolonadës treshe ndodhet mafili prej druri. Minareja është e ndërtuar me klausonazh ashtu si dhe muratura e xhamisë.

HermesNews - ©2013

Dërgo me email | Stampo artikullin