01/02/2013 17:43:41

Prioritetet e mandatit të kreut të Eulex në Kosovë

Z/kryeministrja Tahiri tha se bashkëpunimi me EULEX-in në fushën e sundimit të ligjit, në përparimet e axhendës europiane të Kosovës dhe angazhimi për zbatimin e marrëveshjeve të Brukselit përbëjnë fushat kryesore

PRISHTINË - Shefi i ri i EULEX-it, Bernd Borchardt tha se e mirëpret vazhdimin e bashkëpunimit të mirë me Qeverinë e Kosovës, në një takim sot me zv/kryeministren Edita Tahiri, e cila i uroi punë të suksesshme në krye të Misionit.

Ajo shprehu përkushtimin e Qeverisë së Republikës së Kosovës për vazhdimin e bashkëpunimit të ngushtë me EULEX-in për realizimin e qëllimeve për avancimin e sundimit të ligjit në Kosovë, përmes reformave europiane në sistemin e drejtësisë dhe të zbatimit të ligjit në tërë territorin e Kosovës.

Z/kryeministrja Tahiri tha se bashkëpunimi me EULEX-in në fushën e sundimit të ligjit, në përparimet e axhendës europiane të Kosovës dhe angazhimi për zbatimin e marrëveshjeve të Brukselit përbëjnë fushat kryesore dhe shprehu bindjen për progres të përbashkët në këtë drejtim.

Ajo po ashtu foli për angazhimet serioze të Qeverisë në dialogun për normalizimin e marrëdhënieve në mes dy shteteve, Kosovës dhe Serbisë, me ndërmjetësimin dhe garancitë e BE-së, duke thënë se ky proçes mbështetet nga një konsensus i gjerë politik dhe është në funksion të fqinjësisë së mirë dhe parimeve europiane.

HermesNews - ©2013

Dërgo me email | Stampo artikullin