01/02/2013 09:41:32

Prenga: Pas Ligës Nordike, nis ofensivën për kampionatin

Oslo

ASNN - Një trofe është gjithmonë një mënyrë e mirë për të ngritur moralin dhe skuadra norvegjeze e volejbollit të femrave, Stod Voleji, ku militon 26-vjeçarja shqiptare Arjola Prenga, nuk bën përjashtim nga ky rregull sportiv.

Dhe pasi u mund në finalen e Kupës së Norvegjisë nga rivalja kryeqytetase, Oslo Voleji, duke vijuar të eliminohet edhe nga veprimtaritë europiane (Challenge Cup), fitimi i titullit të kampiones nordike ishte mënyra më e mirë për të lënë gjithçka prapa.

Dhe këtë e pohon edhe Prenga, e cila, duke folur ekskluzivisht për AlbanianSport.net nëpërmjet komunikimit elektronik në Internet, thekson se atmosfera në skuadër është mjaft pozitive.

“Ishte një trofe që erdhi në kohën e duhur, por edhe në mënyrën e duhur, - thotë volejbollistja shqiptare, - sepse ndër të tjera, e arritëm një sukses të tillë duke mundur edhe një rivale norvegjeze, siç është Oslo Voleji. Tanimë, në duelin me të jemi 2-2 dhe do të donim që në fund, bashkë me ndeshjen e fundit, të fitonim edhe titullin.”

Në dy përballjet e deritanishme në kampionat me Oslo Volejin, skuadra e Prengës është mundur 0-3 (25-18, 25-16, 27-25) në kampionat, në javën e 6-të, më 8 dhjetor 2012 në kryeqytet, por ka vijuar të fitojë, po në kryeqytet një muaj më pas, më 12 janar 2013, në takimin e javës së 10-të, ku triumfoi me rezultatin 3-1 (25-22, 12-25, 28-30, 17-25). Ndërkohë, në finalen e Kupës së Norvegjisë më 19 janar 2013, Oslo Voleji fitoi në 3 sete (25-18, 25-22, 25-23), duke marrë edhe trofeun.

Por Prenga dhe skuadra e saj norvegjeze u kundërpërgjigjën, në Kampionatin e Klubeve të Federatës Zonale së Volejbollit të Vendeve të Evropës Veriore (NEVZA), që njihet ndryshe si Kampionati i Klubeve të Vendeve Nordike, i cili zhvillohet çdo vit me pjesëmarrjen e 8 skuadrave nga Norvegjia, Suedia dhe Danimarka, duke u hakmarrë edhe për atë humbje me të njëjtat shifra përballë skuadrës kryeqytetase në finalen e Kupës së Norvegjisë.

Në takimet e ditës së parë të këtij viti, ku faza finale e edicionit të femrave u zhvillua në Danimarkë, Stod Voleji triumfoi në derbin norvegjez ndaj Oslo Volejit, duke fituar në 3 sete (22-25, 13-25, 23-25). “Jo vetëm triumfi ndaj Oslos, por edhe fitimi i trofeut nordike, që mbahej pikërisht nga kjo skuadër, na ka dhënë shumë zemër për të besuar dhe për të luftuar edhe më shumë në kampionat, sidomos kur na është bërë e qartë që në fillim të sezonit që do të luftojmë në të gjitha frontet”, - thekson Arjola.

Në Kampionatin Norvegjez të Volejbollit për Femra, Oslo Volej kryeson renditjen me 27 pikë, po aq sa ka edhe Stod Voleji, që gjithsesi ka luajtur një ndeshje më tepër sesa kryeqytetaset. Edhe me sete, Oslo ka një epërsi ndaj skuadrës së Prengës, pasi ka lëshuar vetëm 4 setet kundrejt 9 seteve të Stodit, ndërsa në pikaverazh, kryeqytetaset janë shumë më mirë. Për këtë arsye, Prenga kërkon që skuadra e saj të mos lëshojë asgjë deri në përfundim të kampionatit.

“Tani e kemi të qartë se titulli mund të ndahet edhe mbi bazën e seteve, prandaj nuk duhet të lëshojmë asnjë set, e jo më të humbasim ndeshje, - thotë ajo në vijim, duke folur për AlbanianSport.net. - Kjo ajo që duhet të bëjmë ne, duke shpresuar njëkohësisht që Oslo Volej të lëshojë sete, pse jo edhe pikë. Ne tanimë kemi epërsi morale ndaj tyre, por është parketi ai që do të vendosë gjithçka.” Prenga ka rrëfyer se titulli i kampiones nordike i ka dhënë shkas një feste në këtë zonë.

“Mediat kanë shkruar gjerë e gjatë për suksesin tonë dhe drejtuesit e klubit organizuan një drekë për nderin tonë, - thotë 26-vjeçarja. - Në fakt, në atë drekë më bëri përshtypje një fakt interesant, pasi të gjithë të pranishmit, afro 50 vetë, ishin të gjithë njerëz që, në një mënyrë apo në një tjetër, në përpjesëtim me rolin që kishin, kontribuonin të gjithë në mbarëvajtjen e skuadrës sonë. Ishim ne lojtaret, stafi teknik, stafi mjekësor, administratorët, drejtuesit e klubit, partnerët komercialë dhe sponsorizuesit, e të tjerë.”

“Dhe të mendosh që të gjithë këta, punonin vetëm për një skuadër volejbolli, - vijon Prenga. - Më bëri përshtypje ky fakt dhe suksesi ynë në Ligën Nordike ishte padyshim meritë, por edhe kënaqësi edhe e këtyre njerëzve dhe të gjithë zonës.” Por, përtej suksesit në Ligën Nordike, Stod Voleji do të rikthehet në kampionat me dy sfida të rëndësishme, atë të së shtunës ndaj Fordes dhe atë të së dielës ndaj BSI-së, dhe të dy këto takime, skuadra e volejbollistes shqiptare do t’i luajë në fushën e vet.

Forde mban vendin e katërt në renditje, me 17 pikë të marra në 11 javë kampionat, por Stod Voleji e ka mundur 3-1 (12-25, 16-25, 25-21, 17-25) në javën e 4-t, më 24 nëntor 2012, si dhe 3-0 (25-21, 25-23, 25-18) në javën e 8-të, më 15 dhjetor 2012 dhe nuk pritet t’i krijojë probleme skuadrës së Arjola Prengës. Por kjo nuk mund të thuhet për BSI-në, që në fakt është ndjekësja më e afërt në renditje e dyshes kryesuese, me 24 pikë të marra në 11 ndeshje.

Për më tepër, kjo skuadër është e vetmja, për Oslo Volejit, që ka mundur t’i shkaktojë një humbje Stod Volejit, pikërisht në atë përballje të javës së 5-të në fushën e vet më 25 nëntor, ku BSI-ja fitoi 3-1 (22-25, 25-19, 25-20, 25-17). Megjithatë, Stod Voleji u kundërpërgjigj në përballjen e dytë, atë të vlefshme për javën e 9-të, më 16 dhjetor 2012, kur fitoi me të njëjtat shifrat 3-1 (25-16, 25-23, 19-25, 25-16) dhe të dielën do të kërkojë të rivendosë epërsinë e saj në përballjen me këtë skuadër.

Kampionati Norvegjez
i Volejbollit - Femra
Eliteserien

Java e 12-të
(2 shkurt 2013)

Stod Vole - Førde (16:00)
Pallati i Sportit “Stod’hallen”

Java e 13-të
(3 shkurt 2013)

Stod Volej - BSI (14:00)
Pallati i Sportit “Stod’hallen”

Java e 14-të
(3 shkurt 2013)

UiS Volej - Stod Volej
Qendra Sportive “SiS Sportssenter”

Renditja
Nr. Skuadra N. F. H. Setet Psh-Pp Pikë
1. Oslo Volej 10 9 1 28-4 781-540 27
2. Stod Volej 11 9 2 28-9 881-691 27
3. BSI 11 8 3 26-12 893-768 24
4. Førde 12 6 6 19-24 870-986 17
5. UiS Volej 10 4 6 15-20 689-761 12
6. Koll 10 1 9 8-28 700-849 4
7. NTNUI Volej 10 0 10 3-30 602-821 0

Rezultatet e skuadrës së Stod Volejit

Java e parë
(6 tetor 2012)

Stod Volej - UiS Volej 3-0 (25-13, 25-8, 25-8)

Java e dytë
(27 tetor 2012)

NTNUI Volej - Stod Volej 0-3 (15-25, 14-25, 19-25)

Java e 3-të
(17 nëntor 2012)

Stod Volej - NTNUI Volej 3-0 (25-22, 25-16, 25-13)

Java e 4-t
(24 nëntor 2012)

Forde - Stod Volej 1-3 (12-25, 16-25, 25-21, 17-25)

Java e 5-të
(25 nëntor 2012)

BSI - Stod Volej 3-1 (22-25, 25-19, 25-20, 25-17)

Java e 6-të
(8 dhjetor 2012)

Oslo Volej - Stod Volej 3-0 (25-18, 25-16, 27-25)

Java e 7-të
(9 dhjetor 2012)

Koll - Stod Volej 0-3 (20-25, 16-25, 14-25)

Java e 8-të
(15 dhjetor 2012)

Stod Volej - Forde 3-0 (25-21, 25-23, 25-18)

Java e 9-të
(16 dhjetor 2012)

Stod Volej - BSI 3-1 (25-16, 25-23, 19-25, 25-16)

Java e 10-të
(12 janar 2013)

Oslo Volej - Stod Volej 1-3 (25-22, 12-25, 28-30, 17-25)

Java e 11-të
(12 janar 2013)

Koll - Stod Volej 0-3 (6-25, 16-25, 17-25)

HermesNews - ©2013

Dërgo me email | Stampo artikullin