25/01/2013 06:15:03

169 vjet nga lindja e Ismail Qemalit

Ceremonitë e planifikuara në nderim të figurës dhe veprimtarisë së tij, nisën me homazhet që u zhvilluan në vendin ku prehen eshtrat e Ismail Qemalit, pranë Sheshit të Flamurit

VLORE - Në kuadër të 169 vjetorit të lindjes, u përkujtua sot në qytetin e Vlorës themeluesi i shtetit shqiptar, kryeministri i Qeverisë së Pavarësisë, Ismail Qemal Vlora. Ceremonitë e planifikuara në nderim të figurës dhe veprimtarisë së tij, nisën me homazhet që u zhvilluan në vendin ku prehen eshtrat e Ismail Qemalit, pranë Sheshit të Flamurit.

Prefekti i Qarkut të Vlorës, Eduart Veçani, drejtues të Bashkisë dhe të forcave politike e mjaft qytetarë, vendosën kurora e tufa me lule në varrin e Heroit të Pavarësisë dhe u përkulën me nderim ndaj emrit dhe figurës së tij. Ndërkohë, në sallën e Teatrit “Petro Marko” u zhvillua edhe një aktivitet zyrtar.

Në vijim të aktiviteti u shfaq një film dokumentar i titulluar “Rrugëtimi i statujës së Ismail Qemalit”, realizuar nga Desdemona Stefa, në qendër të të cilit ishte puna me përkushtim e autorëve të skulpturës monumentale të Plakut të Urtë të Vlorës, e cila u vendos në Sheshin “Pavarësia”, në 27 nëntor të vitit 2012.

Ismail Qemali vdiq në muajin janar të vitit 1919 në Perugia (Itali) dhe trupi i tij u soll në qytetin e Vlorës, ku fillimisht u varros në fshatin e të parëve të tij, në Kaninë. Në 28 nëntor të vitit 1932, me rastin e 20 vjetorit të Shpalljes së Pavarësisë, eshtrat e Ismail Qemalit, u vendosën në Lulishten e Flamurit, ku janë edhe sot. Mbi varrin e tij, u vendos skulptura monumentale Luftëtari i Lirisë, vepër e e skulptorit Odise Paskali.

HermesNews - ©2013

Dërgo me email | Stampo artikullin