22/01/2013 10:00:32

40 stenda për një fshat arbëresh

Në 40 stendat e përgatitura me kujdesin e një studiuesi të mirëfilltë, De Rosa ka përshkruar në gjuhën shqipe, historinë e vendlindjes së tij

DURRES - Një eskpozitë e veçantë, në të cilën përshkruhet rruga e një fshati arbëresh në shekuj, u përurua mbrëmjen e kaluar në galerinë Nikolet Vasia në Durrës. Nën titullin "Fshati im, një fshat arbëresh" Luis de Rosa ka përmbledhur historinë e Ururit, një nga "katundet" pranë Molises (Itali).

Në 40 stendat e përgatitura me kujdesin e një studiuesi të mirëfilltë, De Rosa ka përshkruar në gjuhën shqipe, historinë e vendlindjes së tij. Ekspozita e autori 65-vjeçar, që jeton prej vitesh në Durrës, ka tërhequr interesimin e bashkëqytetarëve intelektualë e krijues, ndërsa nuk kanë munguar edhe artistë dhe njerëz të kulturës nga kryeqyteti, të pranishëm në ceremoninë e përurimit.

"Nuk është një vend dosido Ururi, tregon Luis de Rosa. Tre burra të këtij fshati në vitet 1960-1970 kanë qenë politikanë të njohur dhe deputetë në Parlamentin e Italisë. Tomaso Palmioti ishte 20 vjet kryetar i bashkisë sonë para se të bëhej deputet, së bashku me Luigi Occhioneron", thekson arbëreshi de Rosa. Më i njohuri me siguri ka qenë Mario Tanasi, arbëreshi, që përveçse ministër në disa qeveri arriti të jetë edhe zv/kryeministër i shtetit fqinj.

Në riprodhimet me ngjyra të përzgjedhura për ekspozitën shumë shpesh shihet Skenderbeu, figura më e nderuar mes ururasve. Ende nuk janë zbuluar dokumentat mbi krijimin e Ururit, që duket se ka si datë themelimi vitin 1465, tre vjet para vdekjes së Skënderbeut. "Besohet se paraardhësit tanë erdhën në Itali të dërguar nga Skënderbeu në ndihmë të Mbretit të Napolit gjatë revoltës së baronëve të Apuglias", tregon de Rosa, duke shtuar se kjo pjesë e historisë është ndërtuar me pak dokumenta në dispozicion. Në gravurat dhe fotot e fillimshekullit të kaluar shihen fragmente të kishave të hershme, të fisnikëve dhe brigantëve, që shpesh herë sulmonin "qytethin", e që një herë ia kanë dalë ta djegin atë.

Arbëreshët ruajtën gjuhën, traditat dhe zakonet, pavaresisht se ishin të shpërndarë nëpër Itali. "Në vitin 1968 ne krijuam një Komitet për mbrojtjen e gjuhës arbëreshe dhe shkuam në Romë për homazhe pranë monumentit të Skënderbeut", tregon Luisi fotot bardhë e zi të 45 viteve më parë, që janë ekspozuar në galerinë e Durrësit. Luis de Rosa ka botuar disa libra në gjuhën shqipe dhe arbërishte si "Mjeshtri dhe burri i dheut" e "Unë jam arbëresh", ndërsa drejton prej disa vitesh botimin e revistës së përmuajshme "Kumbora" të fshatit Ururi. Ekspozita "Fshati im, një fshat arbëresh" nga Luis de Rosa do të qëndrojë e hapur 10 ditë.

HermesNews - ©2013

Dërgo me email | Stampo artikullin