21/01/2013 10:44:01

Dobësia e palëve për të negociuar në Luginën e Presheves

Serbët 'veprime të forta' ndaj monumentit të të rënëve

(18:15) "EULEX-i dënon aktet e vandalizmit apo format e tjera të dhunës", thuhet në një deklaratë lidhur me incidentet e fundit në Kosovë. "Protestat paqësore janë normale në çdo shoqëri moderne dhe demokratike, por përdhosja e qëllimshme e varrezave dhe objekteve fetare është absolutisht për t'u dënuar. EULEX-i u bën thirrje qytetarëve të respektojnë ligjin dhe të tregojnë vetëpërmbajtje ndaj çdo akti të dhunshëm", theksohet në komunikatën e sapodërguar nga misioni evropian në Kosovë. Bëhet e ditur se "Policia dhe prokurorët e EULEX-it janë duke vëzhguar nga afër situatën dhe duke bashkërenduar me Policinë e Kosovës dhe KFOR-in". "EULEX-i është i gatshëm të ndërhyjë dhe të mbështesë institucionet vendore të sundimit të ligjit nëse është e nevojshme", përfundon deklarata.


(18:00) Stafi i deputetit socialist Arben Malaj, ka reaguar sot per ngjarjet e djeshme në Preshevë duke i cilesuar "një dëshmi tjetër e mentaliteteve të vjetra që rrezikojnë të tensionojnë zhvillimet në rajon. Ato, jo vetëm që nuk kontribuojnë pozitivisht për paqen dhe prosperitetin në secilin vend te rajonit tonë, por i bëjnë të dobëta dhe të pa qendrueshme arritjet e deri tanishme. Lidershipi politik i Serbisë duhet ta ketë të qartë se rindezja e fitilave nacilonaliste dhe mos respektimi të drejtave universale të minoriteteve nëpërmjet manifestimit të forcës policore do të rikthente risqet e të shkuarës dhe do të rrezikonte sfidat e të ardhmes".


(17:53) Komisioni Evropian shprehu sot shqetësimin lidhur me mungesën e një kompromisi për zgjidhjen e çështjes së lapidarit përkujtimor për luftëtarët e UÇPMB-së në Preshevë, njoftoi faqja zyrtare e internetit e këtij komisioni www.ec.europa.eu.

''Komisioni Evropian vazhdon të mbështesë përpjekjet ndërmjetësuese të OSBE-së'', deklaroi Maja Koçijançiç, zëdhënëse e Përfaqësueses së Lartë Evropiane të Politikës së Jashtme, Catherine Ashton.

Ajo u bëri thirrje të dyja palëve t'i riktheheshin dialogut, të shmangnin konflitet dhe të krijonin një korridor besimi, si dhe po ashtu përqëndrimin tek çështje më të rëndësishme të tilla si zhvillimi social dhe ekonomik i Jugut të Serbisë dhe përmirësimin e pozicionit të minoriteteve.

Lapidari në fjalë u është kushtuar anëtarëve të UÇPMB-së dhe UÇK-së. Lapidari përkujtimor me emrat e 27 anëtarëve të të dyja përfaqësive paraushtarake u vendos nga përfaqësia e shqiptarëve në qendër të Preshevës, në 16 nëntor të vitit 2012, me rastin e 100-vjetorit të Pavarësisë së Shqipërisë.


(17:00) Ambasada e SHBA-ve në Prishtinë deklaroi në një komunikatë se ka parasysh rëndësinë e heqjes së monumentit shqiptar në Luginën e Preshevës gjatë fundjavës dhe shpreh keqardhje që ky veprim ka shkaktuar një reagim të dhunshëm në Kosovë.

"Shtetet e Bashkuara dëshpërohen nga ky përdorim i dhunës dhe dënojnë përsëritjen e dhunës kundër monumenteve të serbëve të Kosovës dhe kishave që kanë ndodhur gjatë natës. Jo vetëm që këto sulme dëmtojnë frymën e multikulturalizmit në Kosovë, por ato gjithashtu vënë në shenjester komunitetet e Kosovës për vendimet e marra në Beograd", thuhet në komunikatën për media të dhënë pak më parë nga Ambasada e SHBA.

Shtetet e Bashkuara i bëjnë thirrje popullit të Kosovës që të respektojnë vlerat e përbashkëta të paqes dhe të tregojë vetëpërmbajtje. "Apelojmë që protestat të jenë të qeta dhe të mbështesin plotësisht qeverinë e Kosovës në thirrjet e saj për qetësi”, përfundon komunikata.


(16:00) Shefi i Misionit të OSBE-së në Kosovë, Ambasadori Jean-Claude Schlumberger, dënoi sot ashpër përdhosjen e disa varrezave ortodokse dhe monumenteve fetare në Kosovë.

Sipas komunikatës së dhënë pak më parë nga Misioni i OSBE në Kosovë, gurët e varrezave ortodokse janë dëmtuar gjatë natës në komunat Kllokot, Obiliq dhe Prizren. Për më tepër, kisha e vogël në varrezën ortodokse në Obiliq mori zjarr. Këto akte vijnë pas përdhosjes së raportuar dhe të dënuar të varrezës ortodokse në Fushë Kosovë një javë më parë.

"Unë i dënoj fuqishëm aktet e përdhosjes së varrezave ortodokse në Kosovë", tha Schlumberger. “Përdhosja e varrezave dhe monumenteve fetare është e papranueshme dhe shkel jo vetëm të drejtat e komunitetit fetar dhe etnik të cilit i përkasin, por edhe të shoqërisë në tërësi”, shtoi ai.

Schlumberger iu bashkua thirrjes së institucioneve drejtuar të gjitha komuniteteve për qetësi dhe përmbajtje nga çfarëdo akti që do të mund të çonte në dhunë dhe mirëpriti gatishmërinë e policisë së Kosovës për të rritur masat e sigurisë për rreth vendeve fetare ortodokse.


(15:00) Klubi i Patriotëve të Rinj zhvilloi sot një protestë paqësore para ambasadës serbe në Tiranë kundër heqjes së lapidarit të UÇPMB-së në Luginën e Preshevës. Protestuesit me pankartat në duar, ku ndër të tjera shkruhej, "Lugina nuk është vetëm", "Një komb, një qëndrim" i kërkuan ambasadorit serb në Tiranë të jepte arsyen e heqjes së lapidarit të UÇPMB-së. Kryetari i Klubit të Patriotëve të Rinj, Ardit Bido, në një prenoncim për mediat, u shpreh se heqja e lapidarit të UÇPMB-së është një padrejtësi që i bëhet jo vetëm shqiptarëve të Luginës së Preshevës, por të gjithë shqiptarëve të Malit të Zi, Maqedonisë, të Shqipërisë dhe atyre të Çamërisë, sepse lapidari i hequr në Preshevë është lapidari i të rënëve të kombit shqiptar.


PRISHTINE - Heqja e pllakes perkujtimore nga ana e autoriteteve serbe, vendosur para Kuvendit të Komunës në Preshevë, u shoqerua me reagime në Prishtinë dhe në Tiranë.

Sot në Preshevë mbahet një protestë gjithëpopullore e shqiptarëve të Luginës. Ky ka qenë vendimi i marrë në mbledhjen e liderëve politikë dhe institucionalë të Luginës së Preshevës lidhur me shqyrtimin e situatës më të re pas heqjeje së lapidarit të dëshmorëve nga sheshi i Preshevës.

Kryeministri i Serbisë Ivica Dacic aksionin e policisë serbe per heqjen e memorialit të UÇPMB-së nga Presheva quan te drejte dhe legjitim. “Unë nuk besoj se veteranët e Al-Qaedas pyeten në Shtetet e Bashkuara apo ata që kanë bërë akte terroriste në Londër e Madrid, nëse duan të vendosin monument.

K/ministri serb Ivica Dacic tha se, "Faktin se Serbia dëshiron të negociojë, dikush e sheh si dobësi tonën. Në Serbi do të respektohen ligjet. Thaçi mund të vë doganierët në pikëkalimet administrative e pastaj thonë se duhet të respektohen ligjet e Kosovës, e kur duhet të respektohen ligjet e Serbisë, hajt të bisedojmë. Nuk ka negociata me terroristët. Me ata që lëvdojnë terrorizmin nuk mund të negociohet. Mund të negociohet me ata që duan të jenë pjesë e sistemit tonë politik dhe kushtetues. Nëse ne nuk kemi treguar tolerancë të mjaftueshme, atëherë unë nuk e di se kush”,- tha Dacic.

Ambasada Amerikane dhe Britanike në Beograd kanë shprehur keqardhje për vendimin e njëanshëm të qeverisë së Serbisë për ta hequr monumentin e UÇPMB-së në Preshevë, vend ku ende mbizotsrojne aksione ts forta dhe ku negociata apo bisedimet mes paleve ende nuk mund ts konsiderohen pa ndsrhyrje nga jashts.

HermesNews - ©2013

Dërgo me email | Stampo artikullin