17/01/2013 12:14:21

Thaçi bën publike agjendën e bisedimene në Bruksel

'Zhbërja dhe largimi i strukturave ilegale të sigurisë së Serbisë nga Kosova', do të diskutohet sot sipas deklaratës së kryeministrit kosovar para nisjes drejt Brukselit

PRISHTINË - Sot zhvillohet në Bruksel takimi i katërt, i pari në 2013-ën, i kryeministrit të Republikës së Kosovës, Hashim Thaçi, me kryeministrin e Serbisë, Ivica Daçiq, në procesin e dialogut për normalizimin e marrëdhënieve Kosovë-Serbi, nën kryesimin e BE-së e mbështetur nga SHBA-të, në vazhdimësi të tre takimeve të vitit 2012, të 19 tetorit, 7 nëntorit e 4 dhjetorit.

“Zhbërja dhe largimi i strukturave ilegale të sigurisë së Serbisë nga Kosova”, do të diskutohet sot sipas deklaratës së kryeministrit kosovar para nisjes drejt Brukselit, për takimin me kryeministrin serb, me lehtësimin e Përfaqësueses së Lartë të BE-së, Baroneshës Catherine Ashton.

“Synojmë shuarjen e strukturave paralele dhe integrimin e plotë të komunitetit serb në institucionet e Kosovës përmes zhvillimit të procesit demokratik të zgjedhjeve edhe në pjesën veriore të Kosovës”, është shprehur kryeministri Thaçi.

“Ne do të respektojmë në tërësi Propozimin Gjithëpërfshirës të Presidentit Ahtisaari, Kushtetutën dhe Ligjet e Republikës së Kosovës, Rezolutën e Kuvendit të Republikës së Kosovës, si dhe marrëveshjet e arritura në Bruksel në dialogun teknik”, ka siguruar kreu i qeverisë kosovare dhe ka ritheksuar se në asnjë mënyrë nuk do të bisedohet për statusin politik e tërësinë territoriale të njohur edhe ndërkombëtarisht e as për organizimin brendshëm të Kosovës.

Para nisjes drejt Brukselit, gjatë ditës së djeshme, kryeministri Thaçi ka mbajtur mbledhjen e qeverisë, pasi ishte takuar me Përfaqësuesin e BE-së në Kosovë, si dhe me përfaqësues të shteteve të Quintit, ku, sipas njoftimit zyrtar, “është diskutuar për zhvillimet aktuale politike në Kosovë, për dialogun mes Republikës së Kosovës dhe Serbisë dhe për tema tjera me rëndësi”.

Ndërsa, në fillim të javës kryeministri kosovar ka takuar përfaqësues të partive politike, përfshirë spektrin politik të opozitës dhe të komuniteteve pakicë, ku lidhur me rezolutën e platformën serbe për Kosovën ritheksoi se “propozimi i Serbisë që komunat me shumicë serbe të marrin Statusin e Komunave Autonome, është i papranueshëm dhe as që do të lejoj që të shtrohet për diskutim”.

Në takimin me kryeministrin Thaçi ishte Isa Mustafa (kryetar i LDK, partisë më të madhe opozitare), Blerim Shala (nënkryetar i AAK, partisë së Ramush Haradinajt), Mimoza Kusari-Lila (nënkryetare e AKR, partisë së Behgjet Pacollit), Mahir Yagxhillar (kryetar i Partisë Demokratike Turke të Kosovës), si dhe Sllobodan Petroviç (kryetar i Partisë Liberale Serbe të Pavarur).

“Të gjithë përfaqësuesit e pranishëm në takim u pajtuan me qëndrimet e prezantuara dhe i dhanë mbështetje kryeministrit për takimin e radhës”, është theksuar në komunikatën nga zyra e kreut të qeverisë së Kosovës.Lëvizja Vetëvendosje, e cila nuk ishte pjesë e këtij takimi, në një konferenc shtypi dje tha se 17 janari i takimit Thaçi-Daçiq në Bruksel “dëmton edhe Kosovën dhe Luginën” pasi shkohet “për të negociuar veriun dhe atë, pa qenë as temë e as kusht të drejtat e shqiptarëve në Preshevë, Bujanoc e Medvegjë”.

HermesNews - ©2013

Dërgo me email | Stampo artikullin