16/01/2013 09:39:58

Jahjaga ndan çmimet për energjinë

Presidentja Jahjaga, sipas zyrës së saj, në ceremoni mori pjesë së bashku me presidentin e Islandës, Olafur Ragner Grimsson, me mbretëreshën e Jordanisë Rania Al Abdullah dhe personalitete të tjera ndërkombëtare

PRISHTINË - Presidentja e Republikës së Kosovës, Atifete Jahjaga, mori pjesë në ceremoninë e ndarjes së çmimeve për inovacionet në fushën e energjisë alternative dhe të qëndrueshmërisë për vitin 2013, në kuadër të samitit botëror të energjisë që po mbahet në Abu Dabi të Emirateve të Bashkuara Arabe.

Presidentja Jahjaga, sipas zyrës së saj, në ceremoni mori pjesë së bashku me presidentin e Islandës, Olafur Ragner Grimsson, me mbretëreshën e Jordanisë Rania Al Abdullah dhe personalitete të tjera ndërkombëtare dhe të Emirateve të Bashkuara të Arabisë.

Njërin nga pesë çmimet "Zayed future energy prize", atë për inovacione në kompanitë e vogla dhe të mesme, e fitoi kompania nga Shtetet e Bashkuara të Amerikës "D. Light", të cilin e ndau presidentja e Republikës së Kosovës, Atifete Jahjaga.

Në këtë kategori kishin konkurruar një numër i madh kompanive nga e gjithë bota. Organizatori kishte paraparë që çmimet të ndahen nga vetëm disa prej personaliteteve të larta të pranishme në këtë Samit dhe nga princi i Abu Dhabit, Sheiku Muhammad bin Zayed al Nahyan.

Ceremonia e ndarjes së çmimeve "Zayed future energy prize" bëhet në ditën e parë të punimeve të Samitit për energjinë në botë që filloi punimet të martën në Abu Dhabi të Emirateve të Bashkuara Arabe, nën patronazhin e princit të Abu Dhabit, Sheikut Muhammed bin Zayed al Nahyan.

HermesNews - ©2013

Dërgo me email | Stampo artikullin