15/01/2013 13:30:26

Perkujtohet Masakra e Racakut

45 shqiptare u masakruan nga forcat serbe

PRISHTINE- Në Kosovë përkujtohet sot masakra e Reçakut, e para 14 viteve, një nga shumë dëshmitë rrënqethëse të krimeve të forcave serbe me përmasa spastrimi etnik e gjenocidi kundër shqiptarëve. Në 15 janarin e vitit 1999, në Reçak, 45 shqiptarë u rrëmbyen në shtëptë e tyre e u masakruan në fshatin e tyre, ku granatimet me artileri të rëndë kishin nisur herët në mëngjes dhe banorët e ndodhur edhe nën rrethimin e hekurt të forcave serbe nuk mund të largoheshin.

Ambasadori amerikan Uilliam Uoker, në atë kohë shef i Misionit Verifikues të OSBE-së në Kosovë, në vizitën në vendin e masakrës dhe duke parë njerëzit e ekzekutuar e masakruar e cilësoi atë krim kundër njerëzimit.

"T’i shohësh kufomat kështu me fytyra të shkatërruara, që si duket janë bërë nga armët që janë mbajtur afër kokave të tyre, t’i shohësh 15 në një gropë, dhe në një mënyrë të ekzekutuar, mendoj se më nevojiten disa minuta para se të përcaktohem se çka dua të them", është cituar sot nga media kosovare deklarata e atëherëshme në Reçak e Ambasadorit Uoker, i cili më pastaj në konferencën me gazetarë, pa ngurrim ka thënë se nga ajo që pa është masakër dhe krim kundër njerëzimit.

Rreth dy muaj pas masakrës së Reçakut, në ndërhyrjen shpëtimtare për Kosovën dhe popullin e saj, aviacioni i NATO-s filloi bombardimet kundër caqeve të forcave kriminale serbe, të cilat zgjatën 78 ditë, deri në kapitullimin e Slobodan Milosheviçit, i cili përfundoi në Gjykatën Ndërkombëtare për Krime Lufte në Hagë.

Në luftën e para 14 vjetëve në Kosovë, forcat ushtarake, policore e paramilitare serbe vranë, masakruan, por edhe zhdukën, më shumë se 12 mijë shqiptarë.

HermesNews-©2012

Dërgo me email | Stampo artikullin