01/01/2013 16:57:08

Bebja e parë në Kosovë, djalë

Viti i Ri në Kosovë, që përkon me 5 vjetorin e Pavarësisë, erdhi edhe me fëmijën e parë djalë, lindur në minutën e parë, ora 00:01, nga nëna e pesë vajzave, në Qendrën Klinike Universitare të Prishtinës

PRISHTINË - Kosova priti Vitin e Ri 2013 nën dritën plot shkëlqim të fishekzjarreve dhe me këngë e valle në sheshet kryesore të kryeqytetit, Prishtinë, e qytete të tjera.

Viti i Ri në Kosovë, që përkon me 5 vjetorin e Pavarësisë, erdhi edhe me fëmijën e parë djalë, lindur në minutën e parë, ora 00:01, nga nëna e pesë vajzave, në Qendrën Klinike Universitare të Prishtinës.

Në 21 shtatorin e vitit që sapo kaloi u publikuan rezultatet përfundimtare të regjistrimit të popullsisë të pranverës 2011, të munguar plot 30 vjet, sipas të cilave në Kosovë, pa veriun, u numëruan 1.739. 825 banorë rezidentë, 92.93 % e të cilëve shqiptarë.

Pjesa tjetër e përqindjeve iu takon komuniteteve pakicë, 1.58% boshnjakë, 1.47 % serbë, 1.08 % turqë, etj. Por, numri i banorëve-shtetas të Kosovës është më i madh, pasi regjistrimi i popullsisë nuk përfshiu një të tretën e kosovarëve që vlerësohet se jetojnë e punojnë jashtë vendit.

Përqindja e komunitetit serb do ishte më e lartë me përfshirjen e veriut në regjistrim. Në veri të Mitrovicës dhe tre komunat veriore - Leposaviç, Zubin Potok e Zveçan, ku u refuzua regjistrimi i popullsisë, sipas një shifre të përmendur nga autoritetet kosovare jetojnë rreth 40 mijë serbë.

Kosova para gjysëm shekulli, në verën e vitit 1962, arrinte numrin prej 1 milion banorë. Sipas statistikave kosovare, në regjistrimin e popullsisë së vitit 1981, ku u përfshinë të gjitha etnitë, Kosova kishte një popullsi prej 1.584.440 banorësh.

HermesNews - ©2012

Dërgo me email | Stampo artikullin