Aktualitet

24/07/2013 18:22:19

Nenet që shkeli Rama në krijimin e dy Ministrive

ZMK reagon ndaj strukturës së re të Qeverisë së Z. Rama, përcakton nenet ku shkelet ligji dhe ngre 7 pyetje parimore mbi politikat për mbrojtjen e konsumatorëve

TIRANE - Avokati Altin Goxhaj: “Z. Rama duhet të sqarojë se a e di ai dhe stafi i tij që shpallja e Ministrisë së Shëndetësisë dhe Mbrojtjes së Konsumatorëve është Shkelja e ligjit për Mbrojtjen e Konsumatorëve dhe ai s’mund ta bëjë këtë pa ndryshuar Ligjin! Çfarë është ky akt? Injorancë apo Arrogancë e Qeverisë së tij ndaj mbrojtjes së konsumatorëve dhe shkatërrimit të mëtejshëm të politikave për mbrojtjen e konsumatorëve ?! Do ti dërgoj Z. Rama me Postën Shqiptare një kopje të Ligjit që ta lexoj vetë se mund ta kenë mashtruar Z. Ditmir Bushati apo Z. Shkëlqim Cani”.

Prezantimi nga Kryetari i PS Z. Rama i Strukturës së re të Qeverisë së dalë nga zgjedhjet e 23 Qershorit 2013 duke prezantuar transferimin e strukturës së mbrojtjes së konsumatorëve është një shkelje e hapur e ligjit për Mbrojtjen e konsumatorëve.

Hapi i parë i Qeverisë së Z. Rama është shkelja e Ligjit Nr. 9902, datë 17.4.2008, për Mbrojtjen e Konsumatorëve, i ndryshuar duke transferuar strukturën e Mbrojtjes së Konsumatorëve pranë Ministrisë së Shëndetësisë ndërkohë që ky Ligj e sanksionon në Pjesa VIII “Institucionet për Mbrojtjen e Konsumatorëve”, Kreu i “Organet Shtetërore”, Neni 49, “Organi përgjegjës” përcaktohet qartazi në pikën 1: “Ministria përgjegjëse për fushën e tregtisë, nëpërmjet strukturës administrative përkatëse (më poshtë struktura përgjegjëse për mbrojtjen e konsumatorëve), harton politikat dhe siguron instrumentet rregulluese të mbrojtjes së konsumatorit, si dhe zbatimin efektiv të këtij ligji.”

Po ashtu edhe në Nenin 50 ku përcaktohet “Këshilli bashkërendues” në Pikën 4. thuhet shprehimisht: “Këshilli Bashkërendues kryesohet nga ministri përgjegjës për fushën e tregtisë.”Dhe në pikën 5 thuhet shprehimisht:. “Rregullorja e funksionimit të Këshillit Bashkërendues miratohet nga ministri përgjegjës për fushën e tregtisë. Struktura përgjegjëse për mbrojtjen e konsumatorëve, e përcaktuar sipas nenit 49 të këtij ligji, ngarkohet me funksionet e sekretariatit teknik të Këshillit Bashkërendues.”

Po ashtu në Neni 51 “ORGANET ZBATUESE” thuhet shprehimisht se “Struktura përgjegjëse për mbikëqyrjen e tregut” janë:1. Struktura përgjegjëse e mbikëqyrjes së tregut, sipas përcaktimit të nenit 16 të ligjit nr. 9779, datë 16.7.2007 “Për sigurinë e përgjithshme, kërkesat thelbësore dhe vlerësimin e konformitetit të produkteve joushqimore”, kontrollon zbatimin e neneve 5, 7, 8, 9, 11, 12, 18, 19, 20 e 21 të këtij ligji.2. Struktura përgjegjëse e mbikëqyrjes së tregut bashkëpunon ngushtë me strukturën përgjegjëse për mbrojtjen e konsumatorëve dhe i raporton asaj.”

Po ashtu edhe në Nenin 52 përcaktohet “Komisioni i Mbrojtjes së Konsumatorëve”“2. Komisioni i Mbrojtjes së Konsumatorëve përbëhet nga 5 anëtarë:a) 2 përfaqësues të ministrisë përgjegjëse për fushën e tregtisë, njëri prej të cilëve nga struktura përgjegjëse për mbrojtjen e konsumatorëve;b) 2 përfaqësues nga Ministria e Drejtësisë;c) përfaqësues nga shoqëria civile me përvojë në fushën e ekonomisë, dhe jurisprudencës.6. Struktura përgjegjëse për mbrojtjen e konsumatorëve ngarkohet me funksionet e sekretariatit teknik të këtij komisioni.”

Pra siç shihet Vendimi për të kaluar strukturën e Mbrojtjes së Konsumatorëve pranë Ministrisë së Shëndetësisë është një akt i pastër i shkeljes së ligjit nga Z. Rama dhe kjo tregon ose arrogancë ose injorancë në fushën e ligjit dhe zbatimit të tij.

E vetmja rrugë ligjore për të kaluar strukturën e Mbrojtjes së Konsumatorëve pranë Ministrisë së Shëndetësisë do të ishte ndryshimi i Ligjit për Mbrojtjen e Konsumatorëve por siç dihet teknikisht asnjë ndryshim në këtë ligj specific smund të kalojë pa një diskutim të gjerë publik dhe kjo kërkon kohë paraprake pasi ky është një kusht i proçesit të integrimit europian dhe 2 deputetët e PSsë Z. Ditmir Bushati dhe Z. Shkëlqim Cani janë në dijeni të plotë të këtij fakti edhe për arsye familjariteti me këtë çështje në të gjithë kuptimet e fjalës.

Gjithsesi kalimi i Strukturës së Mbrojtjes së Konsumatorëve pranë Ministrisë së Shëndetësisë përveç shkeljes së ligjit, krijon edhe një dëm real në fushën e mbrojtjes së konsumatorëve.

Absurditeti i kalimit të mbrojtjes së konsumatorëve pranë Ministrisë së Shëndetësisë një praktikë shterpë që tregon mosnjohjen minimale të politikave për mbrojtjen e konsumatorëve dhe raportin që kanë ato me politikat rregullatore të institucioneve.

Ky akt shtron këto 7 pyetje bazë:
1. Me çfarë kompetence ligjore dhe teknike mund të mbrojë Ministria e Shëndetësisë interesat e konsumatorëve në treg, si dhe të përcaktojë rregullave dhe ngritjen e institucioneve përkatëse për të mbrojtur të drejtat e konsumatorëve?
2. Si mund të përfshijë Ministria e Shëndetësisë në fushën e kompetencës së saj të gjitha llojet e marrëdhënieve ndërmjet tregtarëve dhe konsumatorëve, që kanë të bëjnë me mallrat e konsumatorëve apo shërbime kur ajo ka kompetencë veç në fushën e trajtimit shëndetësor të konsumatorëve?
3. Si mund të trajtojë Ministria e Shëndetësisë të drejtat e konsumatorëve në fushën e mbrojtjes së interesave ekonomikë të konsumatorëve, të drejtat e ankimit, të drejtat për dëmshpërblim, të drejtat e edukimit, të drejtat e marrjes së informacionit, të drejtat e përdorimit të shërbimeve publike, të drejtat e mbrojtjes ligjore, etj.?
4. Me çfarë kompetencë mund të trajtojë Ministria e Shëndetësisë hartimin dhe zbatimin e politikave për praktikat e tregtimit, praktikat e padrejta tregtare, kontratat në largësi apo distancë, kontratat e përdorimit me afat të pasurive të paluajtshme, kredinë konsumatore dhe detyrimet për të, kontratat e paketave të udhëtimit, dhe detyrimet për to siç i përcakton dhe ligji për mbrojtjen e konsumatorëve?
5. Si mundet të trajtohet nga Ministria e Shëndetësisë raporti konsumator biznes në garancitë e produkteve dhe zgjidhja e këtyre mosmarëveshjeve?
6. Si mund të hartohen politikat shtetërore mbi mbikqyrjen e tregjeve industriale dhe financiare, paketat turistike dhe standardet e produkteve dhe shërbimeve?
7. Si mund të hartohen strategjitë e politikave konsumatore dhe rrgullatore nga Ministria e Shëndetësisë?

Ky absurditet i Qeverisë së Z. Rama tregon një degradim të mëtejshëm të politikave shtetërore për konsumatorët.

ZMK i kërkon Kryetarit të PS të sqarojë publikisht këto pyetje dhe ai ka detyrim ta bëjë këtë në zbatim të Programit që ka prezantuar para 23 Qershorit 2013.

Nisur nga fakti se deklarimi i sotëm mbi strukturën e Qeverisë tregon ose injorancë ose shkelje të hapur të ligjit, ZMK i dorëzon simbolikisht me postë një kopje të Ligjit për Mbrojtjen e Konsumatorëve të cilën deputetët e tij e kanë votuar pa rezerva si gjithmonë pasi deri më sot asnjëherë deputetët e Partisë Socialiste nuk kanë dhënë asnjë kontribut për përmirësimin e legjislacionit shqiptar për mbrojtjen e konsumatorëve dhe as kanë kërkuar ndonjëherë ndonjë seancë dëgjimore, interpelancë parlamentare me ndonjë ministër linje në Parlament apo mocion për zbatimin e këtij legjislacioni.

Po ashtu ZMK i kërkon publikisht para Shtatorit një ballafaqim në emër të konsumatorëve përfaqësuesve të PS për të sqaruar publikun mbi shkeljen e ligjit dhe vizionin e PS për avantazhet e kalimit të strukturës së konsumatorëve pranë Ministrisë së Shëndetësisë dhe kjo për hir të transparencës dhe pjesmarrjes publike të premtuar në fushatë dhe program!

Deklaratë për shtyp

stampa | chiudi