Kulturë

27/04/2013 12:14:30

Veprat e fshehura te Alush Shimas

Shima ka ekspozuar për herë të parë vepra të krijuara në fillim të viteve 1968-1973, që sipas tij janë vepra të realizuara në një periudhe të shkurtër lirie të artit vendas

TIRANË - Piktori Alush Shima ka çelur në Galerinë Kombëtare të Arteve ekspozitën e tij vetjake “Territore të vogla lirie”, e përqëndruar në vitet e hershme të punës së artistit.

Ekspozita e kuruar nga Vanja Strukelj dhe Arturo Calzona, sjellin për publikun vepra që prezantohen për herë të parë për publikun ku përshfaqet një mikrobotë të fshehur dhe shumë interesante që ka ekzistuar brenda botës së ngurtë kulturore të Shqipërisë socialiste.

Shima ka ekspozuar për herë të parë vepra të krijuara në fillim të viteve 1968-1973, që sipas tij janë vepra të realizuara në një periudhe të shkurtër lirie të artit vendas dhe janë ruajtur më pas në fshehtësi nga piktori.

“Unë kam qënë një kasafortë e mbyllur me punët e mia. Mbas viteve ’90, kur fillova ti hapja, shumë punë i kisha harruar dhe më dukeshin si punë krejt të reja. Një pjesë ka ndenjur në tavanin e shtëpisë së vjetër”, tha Shima për mediat.

I ekspozuar fare pak gjatë viteve të regjimit socialist, Shima punoi në fshehtësi duke e zhvilluar veprën e tij larg syve të të tjerëve. Disa piktura edhe janë prishur, kanë humbur, por një pjesë e rëndësishme e punëve kanë mbetur për t’u prezantuar në këtë ekspozitë që do që qëndrojë deri në datën 27 maj në GKA.

Kuratorët, Strukelj dhe Calzone janë përqëndruar në këtë periudhë të krijimit të Shimës sepse këto vite janë të një rëndësie të dyfishtë. Së pari, në ato vite kultura shqiptare kaloi në një periudhë të shkurtër lirie për të eksperimentuar dhe së dyti, janë vitet e formimit artistik të Shimës.

“Territore të vogla lirie (1968-1973)” sjellë punë në të cilat ndihet influenca dhe dialogu i artistit me pikturën moderniste perëndimore dhe me autorët kryesorë të saj. Piktura e Alush Shimës është një sintezë e botëkuptimit modernist me botën e tij individuale dhe familjare.

Alush Shima gjatë viteve 1967 – 1990 ka krijuar mbi 5000 vepra në grafikë; të realizuara me penë (bardh e zi) e në teknikën miks (të prekura ngjyra pasteli). Ky koleksion, përveç një sasie të vogël (rreth 150 copë) që u shit pas viteve ’90-të, ruhet në studion e piktorit si dëshmi unikale e një arti ndryshe, antikonformist.

stampa | chiudi

Kulturë

27/04/2013 12:14:30

Veprat e fshehura te Alush Shimas

Shima ka ekspozuar për herë të parë vepra të krijuara në fillim të viteve 1968-1973, që sipas tij janë vepra të realizuara në një periudhe të shkurtër lirie të artit vendas

HermesNews - ©2013