17/11/2014 17:44:32

Taksat që rriten e zerohen për 2015tën

Renta minerale, akciza, dhe taksat mbi të ardhurat. Cilat janë hequr dhe jo ?

TIRANE - "Buxheti 2015, ul ose zeron 15 taksa dhe rrit vetëm tre taksa", siguroi sot kryeministri Rama në Parlament. Opozita nuk ishte e pranishme në seancë. "Mungesa e sotme e opozitës në Parlament është e ndjeshme" tha Rama. Ulja e taksës doganore është një tjetër komponent që ndikon drejtpërdrejt mbi shëndetin e ekonomisë se vendit, ulja e rentës për kromin e përpunuar është një masë që stimulon përpunimin e mineralit në vend.

"Jemi vend i pasur në minerale e krom por për vite të tëra jemi sjellë në mënyrë vandale me këtë pasuri, përfitojmë minimumin nga kjo pasuri. Përmes kësaj mase do fitojmë më shumë. Ulja të taksës për gomat e reja, ngjan diçka pa fort lidhje por ka lidhje të shumëfishta, mbron mjedisin dhe rrit sigurinë", tha ai.

Tre fjalë për tre rritjet. Rritjen e akcizës së cigares Qeveria nuk e konsideron rritje takse, por rritje të fuqisë shtypëse mbi këtë ves që shkatërron shëndetin dhe që sjell vdekje tek njerëzit. "Nuk është shpikja jonë. Të gjithë duhanpirësit duhet të gjejnë paqe dhe duhet ta dinë se rritja e akcizës mbi cigaren do të vazhdojë deri sa të jetë e mundur, sepse ne duam tu vijmë në ndihmë të gjitha familjeve".

Për taksën e qarkullimit mbi benzinën dhe gazoil-in, Rama u shpreh se, "besoj ju kujtohet kur u rrit 10 lekë vitin e kaluar, këtu u bë një betejë për të paralajmëruar fundin e botës. Çfarë ndodhi? asgjë nga ato nuk ndodhi. Sot kemi një çmim më të ulët se sa ai që ishte me plus taksën. Të gjithë duhet të jenë të vetëdijshëm se kjo nuk është një dëshirë e qeverisë për të rënduar ata të cilët përdorin makina, por ky është kontribut i atyre që përdorin makina për të patur një mjedis më të pastër e të mbrojtur dhe për më shumë siguri në rrugë".

Ndërsa për barazimin e tatimit mbi të ardhurat personale dytësore, me tatimin mbi të ardhurat nga paga, Rama u shpreh se, "kishim një disbalancim nga paketa e shkuar, ku tatonim të ardhurat 15 % nga kompanitë dhe të ardhurat dytësore 10%. Thjesht bëjmë një barazim të këtyre dy niveleve duke i dhënë secilit hakun që i takon. Eshtë një masë që na bën me prova të barabartë në trajtim me të tjerët", tha ai.

HermesNews - ©2014

Dërgo me email | Stampo artikullin