13/11/2014 19:50:28

Transferohen hetimet nga Belgjika

Llalla individët që dyshohet se kanë shkelur ligjin në Belgjikë, do të hetohen në Shqipëri

TIRANË - Kryeprokurori i Shqipërisë, Adriatik Llalla i ka garantuar autoriteteve Belge hetimin edhe në territorin Shqiptar të individëve që dyshohet apo kanë shkelur ligjin në Belgjikë. Kryeprorkurori Llalla e bëri të ditur gjatë një takimi të zhvilluar sot në Tiranë me Prokurorin Federal të Mbretërisë së Belgjikës, Frédéric Van Leeuw. Palët ranë dakord për të bashkëpunuar më ngushtë në hetimin e rasteve kriminale dhe në forcimin e luftës së përbashkët ndaj krimit të organizuar. Llalla i shprehu homologut të tij nga Belgjika gatishmërinë e plotë të prokurorisë shqiptare për të zhvilluar hetime në territorin e Shqipërisë për çdo qytetar shqiptar që dyshohet ose është i akuzuar nga autoritetet belge për përfshirje në trafiqe të paligjshme dhe kriminalitet të organizuar. “Krimi i organizuar ka si karakteristikë të tij synimin e përhershëm të përfshihet në ekonominë legale. Për këtë arsye, është shumë i nevojshëm të rritet volumi i shkëmbimi të informacionit ndërmjet strukturave hetimore për të frenuar shtrirjen e aktivitetit kriminal në veprimtari të ligjshme financiare”, u shpreh Llalla. Drejtuesit e prokurorisë shqiptare dhe belge u shprehën se dy vendet tona, gjeografikisht janë të vogla. Për këtë arsye, është shumë e nevojshme që të forcojmë gjithnjë e më shumë bashkëpunimin për të shënuar rekorde suksesi të vazhdueshëm.

HermesNews - ©2014

Dërgo me email | Stampo artikullin