13/11/2014 16:18:14

BE është projekt paqeje

Projekti i BE-së është një projekt paqeje dhe se Evropa nuk dëshiron konflikte

TIRANË - Marrëdhëniet mes Shqipërisë dhe Serbisë kanë qenë në qendër të diskutimeve të Konferencës me temë “Procesi i Integrimit në BE dhe e Ardhmja e Marrëdhënieve Shqiptaro-Serbe”, organizuar nga Instituti për Demokraci dhe Ndërmjetësim (IDM). Kryetarja e Delegacionit të Bashkimit Evropian në Tiranë, ambasadorja Romana Vlahutin, theksoi se, projekti i BE-së është një projekt paqeje dhe se Evropa nuk dëshiron konflikte. Kryetarja e Komisionit Parlamentar për Politikën e Jashtme, deputetja e Partisë Socialiste, Arta Dade, e ka cilësuar vizitën e Kryeministrit Rama në Beograd si një kapitull të ri në marrëdhëniet mes dy vendeve. Sipas saj, Shqipëria dhe Serbia kanë rolin e tyre të padiskutueshëm në bashkëpunimin rajonal. “Në marrëdhëniet shumëplanëshe rajonale unë besoj se kanë qenë prezente. Shqipëria dhe Serbia janë dy vende që kanë rolin e tyre të padiskutueshëm në bashkëpunimin rajonal. Kjo vizitë do i shërbejë konsolidimit të marrëdhënieve. Ne e mendojmë të ardhmen e përbashkët, të dyja qeveritë janë shprehur për aspiratat e popujve përkatëse për tu anëtarësuar në BE”, tha Dade. Fokusi i këtij eventi ishte diskutimi i marrëdhënieve Serbi-Shqipëri në kuadër të integrimit në BE dhe sidomos rolin e elitave politike e shoqërore në rritjen e përpjekjeve ndaj pritshmërive që rrjedhin nga axhenda e përbashkët evropiane, efektet e dinamikave të kohëve të fundit mbi këtë axhendë dhe rrugët nëpërmjet së cilave serbët dhe shqiptarët do të mund të përmirësojnë marrëdhëniet mes tyre.

Dërgo me email | Stampo artikullin