08/11/2014 15:29:16

Meta, Xhuvani solli një standard të ri të figurave publike

Meta komenton veprimin e ish deputetes Xhuvani, flet dhe për vizitën e Ramës në Beograd

TIRANË - Rregulloja e re plotëson një kërkesë të hershme të bërë nga opozita, "në mënyrë që ata të kenë të drejtën e kohës për të folur pas Kryeministrit, po aq sa ai", tha kryeparlamentari Ilir Meta për gazetarët. "Ndoshta nuk mund të gjendet në asnjë Parlament tjetër të asnjë vendi demokratik, por përsëri më mirë të kemi më shumë demokraci sesa më shumë kufizime për arsye të veçorisë". Meta ka dashur të komentojë dorëheqjen e Xhuvanit, "dorëheqja është një akt që vlerësohet dhe sjell një standard të ri në sjelljen e figurave publike, në raport me opinionin publik. Ky është një mesazh për të gjithë deputetët, politikanët dhe zyrtarët", tha Meta. Lidhur me vizitën e ryeministrit Rama të hënën në Beograd, Meta u shpreh se, "është një vizitë që tregon vendosmëri për të ecur më tej drejt rrugës së normalizimit dhe bashkëpunimit midis Serbisë dhe Shqipërisë. Sepse Shqipëria dhe Serbia kanë një përgjegjësi të veçantë për të ardhmen të të gjithë rajonit dhe këtë përgjegjësi do ta ushtrojnë dhe duhet ta ushtrojnë vetëm nëpërmjet bashkëpunimit, përmes tolerancës, përmes kreativitetit, përmes mospërsëritjes së frymës konfliktuale të së kaluarës", tha ai.

HermesNews - ©2014

Dërgo me email | Stampo artikullin