05/11/2014 18:15:30

Ja njeriu më i pushtetshëm në botë

Putin mban vendin e parë në listën e 72 personave më të pushtetshëm në botë duke mënjanuar Obamën

NEW YORK - Presidenti amerikan, Barack Obama kalon në vendin e dytë për t’i lënë homologut të tij rus, Vladimir Putin titullin e njeriut më të pushtetshëm të botës, sipas renditjes vjetore që bën revista ”Forbes”.

“Pas një viti, kur presidenti Putin aneksoi Krimenë, inskenoi pothuajse një luftë në Ukrainë dhe nënshkroi një marrëveshje me vlerë më shumë se 70 miliardë dollarë për ndërtimin e një gazsjellësi me Kinën, projekti më i madh në botë i një natyre të tillë, zgjedhja jonë duket profetike”, shkruan ”Forbes”.

Putin mban vendin e parë në listën e 72 personave më të pushtetshëm në botë duke mënjanuar Obamën, i cili e kishte vitin e kaluar vendin e parë.

Me përjashtim të vitit 2010, kur lista u dominua nga lideri kinez, Hu Jintao, Obama ka qenë gjithmonë në krye të kësaj liste, që nga viti 2009 kur u bë president.

”Forbes” thotë se Obama u rendit i dyti pasi ai u duk në vështirësi pas shpërthimit të Ebolas në Afrikën Perëndimore dhe pas kërcënimeve të Shtetit Islamik.

”Edhe trazirat me prapavijë raciale në Ferguson, Misuri, gjithashtu minuan mesazhin e tij të ‘ndryshimi”, thekson ”Forbes”.

“Ai kishte pushtetin, por u tregua shumë i kujdesshëm për ta ushtruar atë plotësisht”, shton revista.

Putin dhe Obama ndiqen nga presidenti kinez, Xi Jinping, papa Françesku dhe kancelarja gjermane, Angela Merkel./

HermesNews - ©2014

Dërgo me email | Stampo artikullin