05/11/2014 17:57:24

Prokuroria nuk vendosi masë sigurie

Ministri a Brendshme tha se ndaj Kostandin Xhuvanit nuk është vendosur masë sigurie nga Prokuroria në një tjetër ngjarje në Prill të këtij viti

TIRANË - Kostandin Xhuvani ka qenë i përfshirë në një tjetër konflikt të ndodhur me datë 25 Prill 2014 në Gjirokastër, ku pas një grindjeje për motive banale me të riun Ergys Gashi ka qëlluar në ajër me pistoletë. Ngjarja ka ndodhur në Lagjen "18 Shtatori".

Lajmi u konfirmua sot nga Ministria e Brendshme. "Po atë ditë, me shkresë nr. ekstra (883), datë 25.04.2014, është bërë shpallja në kërkim me kartelë me ngjyrë “rozë” e personit të dyshuar për këtë ngjarje, shtetasit Kostandin Gjergj Xhuvani", shkruhet në komunikatën për shtyp.

"Në shkresën nr.786, datë 27.04.2014, materialet proçeduriale në ngarkim të shtetasit Kostandin Xhuvani i janë referuar Prokurorisë së Rrethit Gjyqësor Gjirokastër për veprat penale të Kanosjes dhe Prodhim dhe mbajtje pa leje e armëve luftarake dhe e municioneve, të parashikuara nga neni 84 dhe 278, të K. Penal", shkruhet në komunikatë.

Prokuroria ndaj tij nuk ka vendosur asnjë masë sigurimi, prandaj ndaj këtij shtetasi, mbështetur edhe në Udhëzimin e Ministrit të Brendshëm nr. 56/1 datë 27.05.2013, “Për përdorimin e burimeve të informacionit, marrjen, administrimin, verifikimin dhe vlerësimin e të dhënave” nga Policia e Gjirokastrës është bërë anullimi i kërkimit të këtij shtetasi për kalim të afatit policor.

Komunikata për shtyp e Ministrisë së Brendshme vjen një ditë pas ngjarjes tragjike të ndodhur në kryeqytet, ku si pasojë e një përleshje me armë mbetën të vrarë katër persona, tre të rinj dhe një 60-vjeçar.

Autor i dyshuar i kësaj ngjarje të ndodhur në orët e para të së martës, në rrugës së Elbasanit, pranjë nje klubi nate, është Konstandin Xhuvani, djali i ish-deputetes së Partisë Socialiste, Luiza Xhuvani (Aktorja e mirënjohur Shqiptare pas lajmit dha menjëherë dorëheqjen si deputete e Kuvendit). Bashkë me Xhuvanin u arrestuan edhe dy persona të tjerë, njër prej të cilëve akuzohet si bashkëpunëtor i Xhuvanit, ndërsa personi tjetër u la i lirë disa orë më vonë, pasi nuk rezulton i përfshirë në krim.

HermesNews - ©2014

Dërgo me email | Stampo artikullin