04/11/2014 14:44:55

Si ndodhi vrasja në Tiranë ?

Policia sqaron dinamikat e vrasjes së bujshme në orët e natës në kryeqytet. PD fajëson policinë

TIRANË - Policia e Tiranës zbardh dinamikën e ngjarjeve të ndodhur mëngjesin e sotëm tek Rruga e Elbasanit, ku si pasojë e një përleshje me armë humbën jetën 3 të rinjë dhe një 60 vjeçar.

Në orën 04:21 në sallën operative të Policisë Tiranë kishte telefonuar ish punonjësi i policisë A.B. dhe në orën 04:22 telefonoi një tjetër qytetar. Ata njoftuan se përballë Fakultetit Ekonomik në ambjentet e lokal Gjeta, ka ndodhur një vrasje.

Zv.Drejtori i Rendit, Kryekomisar Ardi Veliu, ka ndërhyrë në komunikimin me radio, për orientimin e shërbimeve dhe kapjen e autorëve të dyshuar.

Autori i parë i dyshuar shtetasi Erald Sina është kapur në afërsi të vendi të ngjarjes ndërsa autori i dytë lëvizi në drejtim të godinës së Fakultetit Ekonomik. Policia rrethoi godinën me synim kapjen e autorit. Në vendin e ngjarjes është kërkuar ndihmë, pasi ka disa të qëlluar me armë zjarri.

Në orën 04:31 autopatrulla Shqiponja Nr.3 në bashkëpunim me patrullën e Komisariatit Nr. 1 raportojnë se u kap edhe autori i dytë i dyshuar, shtetasi Albano Bllacaj, në afërsi të Fakultetit Ekonomik.

Autori i tretë i dyshuar, Konstadin Xhuvani është kapur rreth 70 metra larg vendit të ngjarjes, teksa po tentonte të largohej me pistoletë në dorë. Në momentin e arrestimit ai bëri dhe rezistencë ndaj policisë. Pas kapjes dhe ndalimit të autorëve është bërë shoqërimi i tyre në ambjentet e Drejtorisë së Policisë së Qarkut Tiranë.

Gjithashtu u morën masat për shoqërimin e të gjithë personave prezent në vendin e ngjarjes, 9 persona. Paralelisht nga ambulanca e ardhur ne vendin e ngjarjes ju dha ndihma e parë shtetasit të plagosur Giaampaolo Azzola.

Në vendin e ngjarjes, në bar “Ante Grand” pas hyrjes së forcave të policisë janë konstatuar pranë portës hyrëse të lokalit, trupat e shtetasve: Edison Jaho, vjeç 36, lindur në Berat dhe banues në Tiranë dhe Enea Xhaj, vjeç 38, lindur në Berat dhe banues në Tiranë. Përballë këtij lokali në automjetin tip “Mercedez” me targa “TR 0250N” është gjetur i vdekur shtetasi Arbër Demiraj, 19 vjeç, lindur dhe banues në Tiranë.

Pak kohë më pas në Spitalin Ushtarak Tiranë gjeti vdekjen edhe shtetasi Giaampaolo Azzola, 53 vjeç, me shtetësi dhe kombësi Italiane. Në vendin e krimit, në brendësi të lokalit u gjet një pistoletë model 54. Ndërsa një tjetër pistoletë 54 u gjet në vendin ku u prangos autori i dytë i dyshuar. Lokali ku ndodhi ngjarja nuk ka qënë i siguruar me shërbimin e ruatjes e fizike, ndërkohështetasi A.B, është i punësuar si roje private pranë këtij lokali nate.

Ky lokal është i pajisur me leje 24 orësh nga Agjensia Rajonale e Mjedisit Tiranë dhe i regjistruar pranë QKR, ndërkohë që nga verifikimet e kryera në Sallën e Komandimit nuk rezulton të ketë patur telefonata të mëparshme nga ana e qytetarëve për prishje të rendit nga ky lokal.

Deputeti i Partisë Demokratike, Gent Strazimiri denoncoi sot. pas ngjarjes tragjike në Tiranë, lehtësitë që sipas tij i krijohen krimit e bandave, dhe represionin e dhunshëm policor ndaj qytetarëve të pafajshëm.

Sipas deputetit demokrat, pavarësisht se mijëra ngjarje kriminale që ndodhin çdo ditë në çdo cep të vendit qëllimisht fshihen nga policia, qeveria dhe media pranë saj, situata kriminale në vend po arrin nivele alarmante si kurrë më parë.

Masakra tragjike me katër të vrarë e ndodhur në orët e para të ditës së sotme në një nga rrugët më të ruajtura të Tiranes, më shumë se sa autorët ka përgjegjës drejtuesit e lartë të Policisë së Shtetit, Ministrin e Brendshëm dhe Kryeministrin e vendit, tha Strazimiri.

Sepse, vijoi ai, Kryeministri dhe banda e tij kanë krijuar të gjitha lehtësitë për autorin, djalin e deputetes Xhuvani, që të lëvizë i lirshëm me armë në brez, madje të krijojë edhe një bandë kriminale dhe ta ushtrojë aktivitetin me shantazhe, gjobvënie e vrasje në mes të Tiranës.

Kryeministri dhe banda e tij, e kanë shndërruar Shqipërinë në një paraburgim të madh, ku rrasen “cip mbi cip” qytetarë të thjeshtë vetëm sepse vendosin një tullë, qytetarë që nuk kanë mundësi të paguajnë dritat se nuk kanë bukë të hanë dhe nga ana tjetër kriminelët dhe bandat e organizuara janë më aktive se kurrë dhe kanë kontrollin në territoret e tyre, u shpreh deputeti Strazimiri.

HermesNews - ©2014

Dërgo me email | Stampo artikullin