03/11/2014 15:31:36

Strasburgu rëndon mbi buxhet

Buxheti i shtetit rëndohet gjatë vitit nga vendimet e Gjykatës Ndërkombëtare të Strasburgut, të cilat pothuajse në të gjitha rastet janë në favor të paditësit, me një efekt financiar të konsiderueshëm

TIRANE - Ministria e Financave ka planifikuar në buxhetin e vititi 2015 1.4 miliardë lekë, ose 0.1 % të Prodhimit të Brendshëm Bruto për kompensimin në vlerë të ish-pronarëve. Ministria e Drejtësisë dhe Agjencia e Kthimit dhe Kompensimit të Pronave nisën procesin e konsultimit me grupet e interesit për hartimin e reformës ligjore dhe institucionale të AKKP-së.

Si hap të parë për ndërmarrjen kesaj reforme, qeveria planifikon inventarizimin e dosjeve si dhe nxjerrjen e një fature financiare për kompensimin. Vetëm pasi të nxjerret kjo faturë financiare, e cila ka munguar për 23 vite me radhë, do të mund të nisë hartimi i formulës së kthimit dhe kompensimit të pronave.

Pak ditë më parë Kryetare e Agjencisë së Kthimit dhe Kompensimit te Pronave, Sonila Qato, theksoi se realizimi i një refore ligjore në ketë fushë me qëllim kryesor përmbylljen e procesit të kthimit të pronës, si dhe krijimin e një mekanizmi efektiv kompensimi, si premisë për zhvillimin eknomik, është një nga prioritet e AKKP-së.

Konkretisht, tha Qato, po punojmë për nxjerrjen e faturës së detyrimit që shteti u ka pronarëve. Për këtë, ajo informoi se janë ngritur dy grupe pune që po punojnë për evidentimin e tokës shtetërore që mund të përdoren për kompensim fizik. Edhe pse ende nuk ka një faturë sipas ministrisë së Financave, buxheti i shtetit rëndohet gjatë vitit nga vendimet e Gjykatës Ndërkombëtare të Strasburgut, të cilat pothuajse në të gjitha rastet janë në favor të paditësit, me një efekt financiar të konsiderueshëm.

HermesNews - ©2014

Dërgo me email | Stampo artikullin