31/10/2014 17:50:35

Deri me datë 10 zgjasin aplikimet për vendet vakante të BSH

Parlamenti fillon proçedurat për zgjedhjen e dy anëtarëve të rinj të Këshillit Mbikqyrës të Bankës

TIRANE - Kuvendi hapi zyrtarisht procedurën për zgjedhjen e dy anëtarëve të rinj të Këshillit Mbikëqyrës të Bankës së Shqipërisë. Në një njoftim të publikuar në faqen zyrtare thuhet se “kërkesa e nënshkruar nga kandidati për paraqitjen e kandidaturës, duhet të paraqitet zyrtarisht pranë sekretarisë së Kuvendit të Shqipërisë, brenda datës 10.11.2014, e shoqëruar me dokumentacionin përkatës (CV, fotokopje të librezës së punës, diplomë universitare dhe pasuniversitare, dëshmi penaliteti, si dhe referenca të tjera që provojnë përmbushjen e kritereve ligjore). Në vendimin e miratuar nga Parlamenti në seancën e të enjtes thuhet se në datën 10 nëntor kur të mbyllet edhe afati për aplikuesit, lista e plotë do ti bëhet e ditur deputetëve. Parlamenti, brenda 5 ditëve nga dërgimi i njoftimit te deputetët i listës së kandidaturave të vetofruara, organizojnë dëgjesën publike në mjediset e Kuvendit. Në fund thuhet se jo më pak se 28 deputetë kanë të drejtë të zgjedhin një kandidat që nuk është në listën e aplikuesve për anëtarë të Këshillit Mbikëqyrës. Pas kryerjes së gjithë kësaj procedure Parlamenti do të votojë dy anëtarët e rinj të Këshillit Mbikëqyrës të Bankës.

HermesNews - ©2014

Dërgo me email | Stampo artikullin