30/10/2014 14:44:14

Të hënën P/buxheti në Parlament

Qeveria do të dorëzojë në Parlament Projektbuxhetin e ri, sipas ''sekondës'' që parashikon Kushtetuta

TIRANË - Kryeministri shqiptar, Edi Rama, deklaroi në Kuvendin e Shqipërisë, se të hënën qeveria do të dorëzojë në Parlament Projektbuxhetin e ri, sipas “sekondës” që parashikon Kushtetuta, duke i lënë legjislativit, kohën e duhur për ta diskutuar me grupet e interesit dhe publikut.

“Të hënën kur do të dorëzohet projekt-buxheti i ri, për here të parë Kuvendi do të ketë të gjithë hapësirën kohore të nevojshme për të shtrirë diskutimin me të gjithë grupet e interesit dhe deputetët do të kenë kohën për ta diskutuar me të gjithë zgjedhësit në të gjithë territorin”, tha Rama.

Kryeministri Rama, duke folur për buxhetin është ndalur me ndryshimet që do të pësojë ai në kuadër të reformës radikale në energji. “Kryefamiljarët do të kenë pension të rritur, familjet që marrin ndihmë ekonomike do ta marrin të rritur dhe personat me aftësi të kufizuar do ta marrin pagën e shtuar”, theksoi Rama në fjalën e tij, duke deklaruar se reforma e energjisë do të jetë e thellë dhe e plotë.

Në të shkuarën, tha Rama , “janë bërë ndryshime në adresimin në çështjene e të ardhurave. Janë bërë 4 herë reforma dhe në 4 herë është thënë se do të ketë kompensim ose rimbursim dhe në të 4-tat herë ata që e kanë pësuar kanë qenë më të dobtit. Ata që nuk kanë mundur ti shpëtojnë dhimbjeve të padrejtësisë kanë qenë më të dobtit. Ne nuk do të bëjmë as rimbursim as kompensim, ne do të rrisim pensionet, ndihmën ekonomike dhe pagën e aftësisë. Askush nuk do ndjejë asgjë lidhur me heqjen e të ashtuquajturës fashë mbrojtëse që në fakt është bërë mburojë e hajdutëve të energjisë”.

Kreu i qeverisë shqiptare deklaroi se nga humbjet në sektorin e energjisë shteti humbet investime të mëdha që mund të bëhen në infrastrukturë, sshëndetësi arsim dhe fusha të tjera.

“Do të kalojmë në fazë tjetër të historisë së vendit, që nga sektori energjitik të na vijnë fitimetm të ardhura shtesë për të financuar nevojat e mëdha të këtioj vendi. Kjo është ambicja jonë deklaroi Kryeministri Edi Rama.

“Kemi gjetur një Shqipëri informale dhe kurora me gjëmba e këtij informaliteti që nuk e lë këtë vend të ngrejë kokë është pikërisht grabitja në bashkëpunim e energjisë elektrike dhe krijimi çdo ditë i një grope që thellohet vit pas viti. Duke e lënë vendin tonë të vetmin në Evropë që s’ngjan me asnjë në Evropë. Ne nuk kemi ardhur këtu për qenë të përjetshëm, as për të marrë mandate kot. Kemi ardhur për të mësuar nga shkuara dhe për të shkuar drejt të ardhmes europiane”, tha Rama.

Rama në “Facebook”: Heqja e fashës 300 Kwh, ndihmë që 200 mijë familje në nevojë të mos preken

Më herët sot, Kryeministri Edi Rama me anë të një postimi në rrjetin social ‘Facebook” ka ripërsëritur ndihmën që do t’u japë qeveria pensionistëve, personave me aftësi të kufizuar dhe familjeve në nevojë, për të përballuar pagesën e energjisë elektrike, pas heqjes së fashës 300 Kwh.

“Rritje pensioni për pensionistët kryefamiljarë dhe rritje page për ndihmën ekonomike e për aftësinë e kufizuar, që 200 mijë familje në nevojë të mos preken nga heqja e fashës 300 kwh, por edhe që asnjë hajdut i energjisë të mos fshihet më pas kësaj fashe si deri më sot”, shkruan Kryeministri Rama.

“Çmimi nuk do të rritet”, thekson Rama, “por secili do të paguajë atë që i takon, e kush paguan nuk do të jete më i detyruar të paguajë edhe për ata që vjedhin – siç ka ndodhur zi e më zi për 20 vjet me radhë”.

“Politika jonë e re energjitike do të ndalojë grabitjen e kësaj pasurie të jashtëzakonshme kombëtare dhe do ta rilindë këtë sektor strategjik për zhvillimin e ekonomisë sonë, duke e kthyer brenda 5 vjetësh nga një gropë të zezë humbjesh kolosale, në një burim të madh fitimi për popullin shqiptar”, shkruan më tej Kryeministri Rama.

“Nga nje vend i varfëruar dhe i turpëruar prej vjedhjes së vetvetes”, shton Rama, “do të bëhemi një vend normal dhe i rritur fort ekonomikisht falë vënies në shërbim të interesave të atdheut e të popullit të kësaj pasurie të paçmuar”.

HermesNews - ©2014

Dërgo me email | Stampo artikullin