29/10/2014 12:02:13

Fyle letër inkurajuese Tahirit

Komisioni Europian është i gatshëm të vazhdojë të mbështesë përpjekjet e Shqipërisë për reforma

TIRANË - Në Ministrinë e brendshme ka mbërritur një letër nga Komisioneri për Zgjerimin në Bashkimin Europian, Stefan Fyle. "Më lejoni të theksoj rëndësinë e veçantë që ne i japim luftës së orientuar drejt rezultateve kundër krimit të organizuar dhe korrupsionit", shkruan Fyle. Operacionet e suksesshme, të kryera së fundmi, kundër kultivimit dhe trafikimit të narkotikëve janë hapa të lavdërueshëm në drejtimin e duhur, shkruan në letër Fyle. Komisioni Europian është i gatshëm të vazhdojë të mbështesë përpjekjet e Shqipërisë për reforma, me ekspertizë dhe mbështetje financiare. "Është e qartë që arritja e rezultateve në këtë fushë varet prej vullnetit politik të autoriteteve, si dhe në vendosmërinë, efikasitetin e veprimit dhe koordinimin e të gjithë trupave ligjzbatuese në Shqipëri. Në këtë kontekst, angazhimi personal dhe institucional që ju shprehni është mëse i mirëpritur dhe do të mbetet thelbësor", e mbyll Komisioneri Fyle letrën, drejtuar ministrit Tahiri.

HermesNews - ©2014

Dërgo me email | Stampo artikullin