28/10/2014 20:06:49

Valë arrestimesh në Tiranë

Zëdhënësi i policisë së shtetit Gentian Mullai shkruan në komunikatën për shtyp se gjatë operacionit të ditës së sotme janë arrestuar 52 shtetas

TIRANE - Strukturat e Policisë së Shtetit në të gjithë vendin, kanë filluar zbatimin në terren të masave të posaçme për ndërprerjen e abuzimeve me energjinë elektrike, duke identifikuar dhe vënë para drejtësisë autorët e lidhjeve të paligjshme të energjisë dhe vjedhjes së energjisë elektrike.

Gjatë këtij operacioni strukturat e Policisë së Shtetit po veprojnë në terren në bashkëpunim me specialistët e OSHEE, përmes grupeve të përbashkëta, të cilët po ushtrojnë kontroll të plotë të territorit, duke filluar nga zonat me humbjet më të mëdha në rrjet dhe në çdo rast po kryejnë dokumentacionin për kapjen në flagrancë të vjedhësve të energjisë, duke bërë njëherazi dhe ndërprerjen e lidhjeve të paligjshme.

Gjatë ditës së sotme nga strukturat e Policisë së Shtetit është mbështetur OSHEE në 283 raste. Pas kontrolleve të ushtruara deri në orën 19:00 tw ditës sw sotme është marrë masa e arrestit në flagrancë ndaj 49 personave, kryesisht pronarë të subjekteve të biznesit, të cilët akuzohen për vjedhje të energjisë elektrike, si dhe janë shpallur në kërkim 7 persona.

Nga Drejtoria e Policisë së Qarkut Tiranë janë arrestuar në flagrancë 21 pronarë të bizneseve të ndryshme, të cilët janë konstatuar që kryenin vjedhje të energjisë, si dhe janë shpallur në kërkim 4 të tjerë pronar të subjekteve të biznesit.

Nga Drejtoria e Policisë së Qarkut Fier janë arrestuar 5 persona, pronarë të subjekteve të biznesit
Nga Drejtoria e Policisë së Qarkut Lezhë janë arrestuar 6 persona
Nga Drejtoria e Policisë së Qarkut Durrës është arrestuar 1 person
Nga Drejtoria e Policisë së Qarkut Kukës është arrestuar 1 person
Nga Drejtoria e Policisë së Qarkut Berat është arrestuar 1 person
Nga Drejtoria e Policisë së Qarkut Korçë është arrestuar 1 person
Nga Drejtoria e Policisë së Qarkut Elbasan janë arrestuar 2 persona
Nga Drejtoria e Policisë së Qarkut Shkodër janë arrestuar 3 persona
Nga Drejtoria e Policisë së Qarkut Dibër është arrestuar 1 person
Nga Drejtoria e Policisë së Qarkut Vlorë janë arrestuar 5 persona
Nga Drejtoria e Policisë së Qarkut Gjirokastër janë arrestuar 2 persona

Ndërkohë vijon kryerja e veprimeve procedurale për rastet e tjera të konstatuara nga strukturat e policisë. Nga strukturat e Policisë së Shtetit, po punohet dhe në drejtim të identifikimit të personave që krijojnë lehtësira për t’u kryer ky aktivitet i paligjshëm, siç mund të jenë punonjës të vetë OSHEE apo ish punonjës të këtij institucioni, duke marrë dhe masa ndaj tyre. Në këtë kontekst në të gjitha rastet e konstatimeve të krijimit të lidhjeve të dyfishta të energjisë elektrike për vjedhje apo abuzime të tjera do të kryhen hetime të plota për të identifikuar punonjësin që ka njohuri të posaçme për kryerjen e lidhjeve të tilla duke filluar procedimin penal.

Konkretisht gjatë ditës së sotme është arrestuar nga Drejtoria e Policisë së Qarkut Tiranë një faturist dhe nga Drejtoria e Policisë së Qarkut Fier janë arrestuar 1 inxhinier dhe 1 elektricist nën akuzën e konsumimit të veprës penale të shpërdorimit të detyrës.

Policia e Shtetit do të vijojë me vendosmëri masat e marra në kuadër të këtij operacioni të rëndësishëm për vendin, duke përballur me forcën e ligjit të gjithë ata persona, të cilët abuzojnë me energjinë elektrike, duke e vjedhur atë, apo duke mos paguar për konsumin që kryejnë, qofshin këto biznese, individë apo punonjës të institucioneve dhe të vetë OSHEE.

komunikatë për shtyp

Dërgo me email | Stampo artikullin