25/10/2014 12:00:19

Cili është biznesi më fitimprures në vend ?

Kane fitim rekord por probleme me pagesat dhe shpërndarjen e shërbimit

TIRANE - Prodhimi i energjisë elektrike në vend është një nga bizneset më fitimprurëse. Revista Monitor në një studim të saj rendit 100 kompanitë më të sukseshme për vitin 2013.

Firma "Erdat Lura" që ka ndërtuar me koncesion dhe që menaxhon hidrocentralet Lura 1, 2 dhe 3, deklaroi në bilancin 2013 fitimin prej L364 milionë dhe renditet në 35 kompanitë me fitim më të madh në vend. Kompania gjeneroi një prodhim prej 53,296 Mwh në 2013-n, sipas të dhënave nga ERE (Enti Rregullator i Energjisë) ndërsa të ardhurat e fituara vjet nga shitja e energjisë ishin 577 milionë lekë,

Kompania HEC i Tërvolit vjet dyfishoi fitimet në 230 milionë lekë, kompania GJO-SPA Power rezulton me një fitim 243 milionë lekë, duke u renditur në vendin e 59 ndër 100 kompanitë me fitim më të madh në vend, gjithashtu dhe kompania Euron Energy Group, etj.

Por edhe pse kanë rezultuar me fitime në bilance, një pjesë e këtyre operatorëve kanë probleme me arkëtimin e pagesave nga shitja e energjisë tek KESH-i, duke hyrë në vorbullën e krizës që po kalon sistemi energjetik në Shqipëri, nga prodhimi, tek shpërndarja dhe konsumatori fundor.

Ministria e Energjetikës do të rishikojë kontratat favorizuese që qeveria e mëparshme kishte nënshkruar me operatorët privatë, ku KESH detyrohej t’ua blinte prodhimin 10% më shtrenjtë se çmimi i tregut.

Sipas ERE-s, gjatë vitit 2013, në Shqipëri prodhuan energji elektrike 80 centrale hidrike me fuqi të përgjithshme të instaluar rreth 240 MW. Prodhimi i përgjithshëm për vitin 2013 nga prodhuesit privatë dhe ata që zotërojnë marrëveshjet me koncesion, arriti në 11% të prodhimit të përgjithshëm të energjisë neto në vend.

HermesNews - ©2014

Dërgo me email | Stampo artikullin