23/10/2014 11:00:38

Kjo nuk i siguron qytetarët

Ende asnjë vendim për rritje taksash, por në tavolinën e Ministrisë së financave diskutohet rritje taksash për vitin tjetër. Taksat që mund të ndryshojnë përsëri janë, akciza, tatimi mbi të ardhurat personale, taksa për qarkullimin, tatimi mbi dividentin dhe të ardhurat e tjera

TIRANE - Nuk është marrë ende asnjë vendim për rritjen e taksave, por kjo nuk do të thotë se shqiptarët për vitin e ri nuk do të kenë rritje taksash. Propozimet e reja të FMNsë janë në tavolinën e Ministrisë së financave në Tiranë. Ministri i financave Shkëlqim Cani kishte thënë se parashikohen rritje taksash për vitin tjetër. Dy nga taksat që pritet të kenë ndryshime janë akciza dhe tatimi mbi të ardhurat personale. Tatimi mbi të ardhurat personale të pagës së të punësuarve, kaloi nga tatimi i sheshtë 10 %, në tatim progresiv. Një ndër taksat më të debatuara për rritjen e saj dhe efektet direkte që jep tek qytetarët ishte ajo e akcizës. Efekti financiar që do të ketë paketa fiskale në buxhetin e shtetit për vitin e ardhshëm pritet të jetë në rreth L10 miliardë. Gjithashtu, diskutohet se pritet rritje e taksës së qarkullimit dhe tatimi mbi dividentin dhe të ardhura të tjera. Aktualisht, taksa e qarkullimit është 17 lekë për çdo litër karburant dhe pritet që fillim të vitit pasardhës të bëhet 27 lekë, pa përfshirë edhe TVSH-në, që e rrit këtë vlerë dhe me 5.4 lekë të tjera.

HermesNews - ©2014

Dërgo me email | Stampo artikullin