22/10/2014 16:01:56

FILLON AKSIONI KUNDËR LIDHJEVE TË JASHTËLIGJSHME

Pas pesë ditësh Policia e Shtetit fillon aksionin e ri. 150 milionë Euro vidhen çdo vit: projektet që do të financohen me këto para

TIRANË - Kryeministri Edi Rama ka kërkuar sot praninë e mediave për të shpallur aksionet e reja të policisë së shtetit kundër vjedhësve të energjisë elektrike. Pas ndërtimeve pa leje, për të cilat operacioni i INUK do të shtrihet në të gjithë territorin, tani radha e lidhjeve të jashtëligjshme të dritave. Të gjithë abuzuesit kanë pesë ditë kohë për t'i hequr.

Plani operacional ka përfunduar dhe do të udhehiqet nga kompania e shpërndarjes dhe Policia e Shtetit e cila do të përfshihet e tëra. Ata që paguajnë dritat, "nuk janë vetëm ata që fusin dorën në xhep si qytetarë por dhe të gjithë ata që kontribuojnë që ky shtet të mund të marrë kredi për sektorin energjetik", tha Rama. Dita e një operacioni që do të çlirojë shumë nga projektet e pamundura sot, pasi janë rreth 150 milionë euro që çdo vit vidhen, humbasin, shpërdorohen, njofton Rama.

"Janë 80 deri në 100 kilometra rrugë që në vend se të ndërtohen vit pas viti, mbeten të pandërtuara, sepse ato para i vjedhin hajdutët e energjisë elektrike; Janë 150 shkolla të reja. Përfytyroni, 150 shkolla të reja, që mund të ndërtohen me paratë që vjedhin hajdutët e energjisë elektrike; Janë 6 spitale të reja, moderne, rajonale të standardeve europiane që mund të ndërtohen me paratë që vjedhin hajdutët e energjisë elektrike; Janë të gjitha paratë që ky shtet paguan për gjithë familjet në nevojë për ndihmën ekonomike që i vjedhin hajdutët e energjisë elektrike. Pra, me ato para mund të paguajmë të gjithë ndihmën ekonomike; Janë aq sa dhjetëfishi i mbështetjes që ky shtet i jep fermerëve, për të punuar tokën, për të nxjerrë prodhime, për të eksportuar, për të mbajtur familjen, që i vjedhin hajdutët e energjisë elektrike; Janë sa kontributi përmes tatim-fitimit i të gjithë sipërmarrjeve shqiptare, që vidhen nga hajdutët e energjisë elektrike; Janë aq sa fondi i investimeve publike me financim të brendshëm të këtij shteti, paratë që vjedhin hajdutët e energjisë elektrike. Për këtë arsye, hajdutët e energjisë elektrike janë armik i përbashkët i popullit shqiptar, janë armik i përbashkët i Shqipërisë sot, janë armik i përbashkët i të ardhmes së të gjithë fëmijëve tanë", tha Rama.

Pesë ditë kohë përpara se trupat e policisë të lëshohen në territor njësoj siç u lëshuan në Lazarat. "Përpara se të flasim për rritje të çmimit të energjisë elektrike, në radhë të parë, duhet të garantojmë barazinë në marrjen e përgjegjësisë individuale", tha Rama.

Pperacioni do të lançohet publikisht pas pak ditësh, me të gjitha detajet, por ndërkohë, "këto ditë, u japim kohë të gjithë atyre që kujtojnë se kështu e ka Shqipëria, që të kuptojnë që nuk e ka kështu Shqipëria", tha Rama.

HermesNews - ©2014

Dërgo me email | Stampo artikullin