17/10/2014 16:13:21

Po sikur të hetojmë dhe UEFAn ?

nga Doriana Metollari

HermesNews - Kemi të drejtë morale dhe ligjore të kërkojmë hetim për të gjitha incidentet e ndodhura në stadiumin e beogradit në Serbi, por nuk mund të pretendonim një ndeshje normale me të gjitha parametrat demokratikë në një vend me të cilin jemi vrarë e prerë gjatë gjithë historisë. Mos t'i përmendim fare marrëdhëniet nomale, sepse në Ballkan nuk ekzistojnë mes popujve.

UEFA këtë e di.

Sa herë që dy shtete në konflikt luajnë futboll, UEFA tregohet e kujdesshme që të mos qëllojnë afër, siç bëri me spanjën dhe gjibraltarin, që tek e fundit nuk ishin dhe aq problematike sa ne me serbinë. E megjithatë UEFA nuk i vuri të luajnë me njera - tjetrën. Me ne po. Pse ?

Pse e theu rregullin këtë herë ? Provokoi për të parë si do të shkonte situata ? A do të menaxhohej si duhej ? A do të ishim në gjëndje të luanim një ndeshje pa konflikt ? A mund të jetë bërë për të vënë në provë rusinë ? Duke provokuar konflikt me siguri Rusia do të ishte gati t'i dilte në krah serbisë siç dhe ndodhi.

Ishtë e trishtueshme të mendoje se kryeministri Rama do të anullonte takimin në Beograd, çfarë do t'a zhyste rajonin prapë në ndarje dhe mllefe që kush e di se kur do t'i vinte radha për u hedhur pas krahëve. Ndoshta kjo erdhi tamam në kohë për t'i treguar europës së po, ne udhëhiqemi nga një llogjikë e shëndoshë dhe i ndajmë situatat.

Kjo s'ka të bëjë me tolerancën e fyerjes së simboleve tona, që me siguri duhet të hetohet nga ata që paguhen për ta bërë.

Por le ta themi troç, nuk ishte flamuri shqiptar ai që u përdhos, ishte një bashkim flamujsh, ishte harta e shqipërisë së madhe.

Ai dron nuk duhej të ishte atje.

Jo sepse droni me hartën e shqipërisë së madhe është gabim në një shtet normal, por sepse në Serbi, në mes të flakëve nuk duhej të hidhej asnjë pikë benzinë. Droni ishte pakujdesi.

Ne mund të mos pranonim të luanim në Serbi, që në fillim. Mund të luanim në një fushë neutrale, mund të luanim kudo përveçse në Serbi.

Shumë mund të mos jenë dakord me këto që po shkruaj, ndoshta mund të më quani dhe antikombetare, e megjithatë i juaji do të ishte një pikëvështrim shumë i ngushtë.

Shqipëria duhet të kërkojë hetim per fyerjet e himnit dhe nuk ka për të marrë asnjë të drejtë nëse do të kapemi tek e drejta për të ulur hartën e shqipërisë së madhe në fushën serbe, sepse konsiderohet provokim.

Shqipëria duhet të kërkojë hetim për dhunën gjatë himnit, për fyerjet e lojtarëve, por dhe të kërkojë nga UEFA arsyet pse i vuri afër këto dy skuadra, kur rregullat parashikojnë ndryshe ?

HermesNews - ©2014

Dërgo me email | Stampo artikullin