16/10/2014 12:21:40

Parlamenti merr në dorë akcizat për cigaret

Sipas p/ligjit, propozohet rritja e akcizës së cigares, nga 90 lekë paketa me 20 cigare, në 110 lekë paketa me 20 cigare

TIRANE - Kuvendi pritet të nisë shqyrtimin e ndryshimeve në p/ligjin “Për akcizat” që rëndon taksat mbi cigaret, përmes rritjes së akcizës dhe efektit nga Tatimi mbi Vlerën e Shtuar. Sipas p/ligjit, propozohet rritja e akcizës së cigares, nga 90 lekë paketa me 20 cigare, në 110 lekë paketa me 20 cigare. Për vitin 2016-17 akciza do të rritet me 10 lekë. Përmes kësaj mase, Qeveria u merr duhanpirësve 40 milionë dollarë taksa shtesë në vit, ndërsa argumenti i qeverisë ishte se rritja e akcizës ishte direktivë e Bashkimit Europian si dhe masë për uljen e duhanpirjes. Për të mos lejuar që paratë të përfitohen nga tregtarët, Këshilli i Ministrave kishte parashikuar kufizimin e importeve deri në hyrjen në fuqi të ligjit me 15 për qind mbi mesataren e vitit të kaluar. Por, me propozim të Kryetarit të Ekonomisë, Erjon Braçe, masa u shtrëngua edhe më shumë dhe madje edhe koha në të cilën ajo nis efektet. Veç taksës mbi cigaret, Komisioni ndryshoi edhe nismën e Qeverisë për të taksuar me akcizë të gjitha biokarburantet, si ato që prodhohen në vend, ashtu dhe ato të importit. Për to do të flitet sot në Parlament.

HermesNews - ©2014

Dërgo me email | Stampo artikullin