07/10/2014 16:50:17

Mbi 130 mijë emigrantë u kthyen

Sipas anketimit të kryer për studimin, rezulton se në 5 vitet e fundit janë rikthyer në Shqipëri 133.544 emigrantë, prej të cilëve, 74% meshkuj

TIRANË - Instituti i Statistikave, (INSTAT) dhe Misioni i Organizatës Ndërkombëtare për Migracionin (IOM) në Shqipëri prezantuan sot studimin “Migracioni i kthimit dhe ri-integrimi në Shqipëri, 2013”, me fokus, emigracionin dhe riintegrimin e emigratëvë të rikthyer në vitet 2009-2013. Sipas anketimit të kryer për studimin, rezulton se në 5 vitet e fundit janë rikthyer në Shqipëri 133.544 emigrantë, prej të cilëve, 74% meshkuj. Greqia zë vendin e parë për numrin e emigrantëve, por dhe rikthimin e një pjese të madhe të tyre, e pasuar nga Italia. Nga Greqia emigrantët e rikthyer përbëjnë 70.8% të totalit dhe 23.7% nga Italia. Në Greqi pjesa kryesore e emigrantëve shqiptarë kishin qëndruar për punë jo më pak se 7 vjet. Arsyet kryesore të ikjes në emigracion kanë qënë ekonomike, ku mbizotëronte papunësia. Mosha mesatare e ikjes së shqiptarëve në emigracion mbi moshën 18 vjec, llogaritet 30,7 vjec, ndërsa pas rikthimit, 38,3 vjec e lart. Arsyet e rikthimit lidhen me krizën ekonomike që përfshiu Greqinë në vitin 2008, ku papunësia e madhe detyroi rikthimin në atdhe të një numri të madh të emigrantëve shqiptarë. Rreth 94% e totalit të tyre pohojnë rikthimin me dëshirë. Pas Greqisë në vendin e dytë të rikthimit të emigrantëve është Italia për të njëjtat arsye, pohohet në studimin e INSTAT-it. Emigrantët e rikthyer në pjesën më të madhe u vendosën në Tiranë dhe jo në vendlindjen e origjinës së tyre. Pas kryeqytetit, vijnë Durrësi dhe Vlora, qytetet ku mundësitë për krijimin e punës dhe bizneseve të vogla duket se janë më të mëdha.

HermesNews - ©2014

Dërgo me email | Stampo artikullin