04/10/2014 12:15:06

Myslimanë kremtuan Kurban Bajramin

Kjo e sotmja është dita e mirënjohjes ndaj begative të panumërta që Allahu i madhërishëm i dërgon njerëzve të tij

TIRANË - Besimtarët myslimanë kremtuan sot Kurban Bajramin. Kremtimi i kësaj feste nisi në orët e para të mëngjesit, kur mijëra besimtarë myslimanë u mblodhën në Bulevardin “Dëshmorët e Kombit” në Tiranë për të falur Namazin. Kreu i Komunitetit Mysliman, Skënder Brucaj, duke uruar të gjithë besimtarët mysliman, theksoi se kjo ditë synon bashkimin. “Kjo e sotmja është dita e mirënjohjes ndaj begative të panumërta që Allahu i madhërishëm i dërgon njerëzve të tij. Le t’i gëzohemi së bashku kësaj dite të begatë. Le t’i shohim të gjithë njerëzit me syrin e madhërisë, ashtu siç na sheh i madhi Zot. Kjo ditë synon bashkimin e zemrave. Gëzuar për shumë vjet festën e Kurban Bajramit, paqe e begati”, tha Bruçaj. Programi nisi sot nga ora 7:00 – 7:32 e në vazhdim do të vijojë me Lexim nga Kurani, Ilahi nga grupi i Medresesë së Tiranës, Ligjërata me temë ‘Rëndësia e Kurban Bajramit’, përshëndetja e kryetarit të KMSH-së, Falja, Hytbeja e Bajramit dhe qerasje për të pranishmit. Nderkohe, në orën 10.00 do të fillojnë pritjet në selinë e Komunitetit Mysliman Shqiptar.

HermesNews ©2014

Dërgo me email | Stampo artikullin