02/10/2014 18:40:46

One Stop Shop, në çdo drejtori policie

Shërbime për qytetarin 24 orë në 24. Tahiri, deri dje kishte shumë burokraci dhe korrupsion, që sot denoncimet me faturë

TIRANË - Kryeministri Edi Rama mori pjesë sot në inagurimin e ambienteve të Drejtorisë së Policisë së Tiranës si dhe të çeljes në këtë Drejtori të zyrës One-Stop-Shop për shërbimin e qytetarëve. "Në të gjithë këtë periudhë kohe janë bërë shumë gjëra, por ajo që s’është bërë ende, sepse kërkon kohë dhe qasje të re është shërbimi cilësor për qytetarët", tha Kryeministri Rama. "Transformimi godinës ka të bëjë me transformimin brenda saj. Kalohet nga një shërbim i degraduar, në një shërbim që do të funksionojë 24 orë në 24", tha Rama.

Ministri i brendshëm Saimir Tahiri, i pranishëm po ashtu, nënvizoi faktin se me këtë inaugurim shmangen burokracitë dhe korrupsioni. "Këto zyra do të jenë të hapura 24 orë, në shërbim të qytetarëve, dhe se këto zyra do të ngrihen në çdo Drejtori policie në vend", tha ministri. Zyrat ofrojnë 75 lloje shërbimesh administrative. Deri dje kjo kishte burokraci, korrupsion. Qytetari e merr shërbimin si në rrethe ashtu dhe në kryeqytete, pa u detyruar të kontaktojë me shumë njerëz, duke u paraqitur para Drejtorisë së Policisë. "Nga sot qytetari nuk do të paraqitet tek një roje, por tek këto zyra që do të jenë të hapura 24 orë në 24", tha Tahiri.

Një tjetër risi që do të eliminojë korrupsionin është edhe fatura e denoncimit që do të marrë qytetari në momentin që bën denoncimin në zyrat e policisë, të cilat kanë edhe numrin unik të çështjes, që sipas ministrit do të krijojë lehtësira pasi proçesi mund të kontrollohet që nga shtëpia.

Ministri shtoi se kjo do të bëjë të mundur edhe evitimin e mos efektivitetit të punës së policisë, ndërsa nga ana tjetër, është një garanci për punën e efektivëve blu.

HermesNews - ©2014

Dërgo me email | Stampo artikullin