29/09/2014 16:11:04

Rritet sigurimi vullnetar

3,128 milionë lekë, ose 8.25% më shumë se në periudhën Janar - Gusht 2013 janë rritur primet e sigurimit vullnetar

TIRANË - Primet e sigurimit vullnetar, gjatë periudhës Janar - Gusht 2014 arritën rreth 3,128 milionë lekë, ose 8.25% më shumë se në periudhën janar-gusht 2013, ndërsa numri i kontratave të sigurimit vullnetar u rrit me 0.63% krahasuar me periudhën janar-gusht të një viti më parë. Sipas statistikave zyrtare të Autoritetit të Mbikqyrjes Financiare, sigurimet vullnetare të jo-jetës gjatë periudhës janar-gusht 2014, patën rritje me rreth 7.53% kundrejt periudhës janar-gusht 2013. Në portofolet e pronës, përgjegjësive, garancive të cilat gjatë periudhës janar-gusht 2014, siguruan rreth 1,506 milionë lekë të ardhura në total, vendin e parë e zunë zjarri dhe dëmtime të tjera në pronë, me rreth 67.30% të pasuara nga sigurimi i përgjegjësive të përgjithshme civile me rreth 20.60% të totalit. Referuar statistikave, në portofolin “sigurimi nga zjarri dhe forcat e natyrës”, gjatë periudhës janar-gusht 2014, vihet re një rritje prej 19.38% e volumit të primeve të shkruara bruto të këtij portofoli dhe një rritje me 0.74% e numrit të kontratave të sigurimit, krahasuar me periudhën janar-gusht të viti 2013. Të ardhurat nga sigurimet e aksidenteve dhe shëndetit, gjatë periudhës janar-gusht 2014, arritën në rreth 545 milionë lekë, duke shënuar rritje prej 18.02% në krahasim me periudhën janar-gusht 2013.
Primet nga sigurimet e Jetës gjatë periudhës janar-gusht 2014, arritën rreth 699 milionë lekë, ose rreth 10.79% më shumë se në periudhën janar-gusht të vitit të kaluar.

HermesNews - ©2014

Dërgo me email | Stampo artikullin