29/09/2014 13:31:47

Dialogu i Lartë: Basha takon komisionerin Fyle

Basha, ''Si opozitë kemi qenë dhe jemi të vendosur për të bërë gjithçka për përparimin europian të vendit. E dëshmojmë këtë sot me praninë tonë në tryezën e dialogut të lartë''

TIRANE - Kryetari i partisë demokratike, Lulzim Basha u takua sot me Komisionerin për zgjerimin në bashkimin europian, Stefan Fyle për tryezën të fundit të Dialogut të Nivelit të Lartë. Lufta kundër krimit ka qenë një ndër temat kryesore të takimit, gjatë të cilit Basha akuzoi kryeministrin se "ka krijuar në Parlament një strukturë të posaçme dhune me kriminelë të dënuar dhe të dyshuar si akoma aktivë në fushën e krimit të organizuar, për t'i mbyllur gojën opozitës".

"Si opozitë kemi qenë dhe jemi të vendosur për të bërë gjithçka për përparimin europian të vendit. E dëshmojmë këtë sot me praninë tonë në tryezën e dialogut të lartë, e dëshmojmë këtë me gadishmërinë tonë për të kontribuar në procese të rëndësishme siç është reforma në drejtësi, por ndërkohë që ne dëshmojmë këtë vullnet të mire, shumica bën akte të paligjshme siç është komisioni hetimor i cili nuk ka për qëllim reformën e drejtësisë por ka për qëllim të kapë Këshillin e Lartë të Drejtësisë", denoncon Basha, që përmend tre ligjet të Këshillit të Lartë të Drejtësisë, Gjykatës Administrative, Shkollës së Magjistraturës, "përkundrejt kërkesave të Bashkimit Europian, të Shteteve të Bashkuara të Amerikës dhe vendeve anëtare, shkuan në Parlament, u votuan dhe u rivotuan edhe kur Presidenti i ktheu si antikushtetuese", tha ai gjatë bisedës me komisionerin Fyle.


Intervista/ Basha, a ju kërkoi marrëveshje pakisë-shumicë që do të mundësonte kthimin tuaj në Parlament? Ishte një ndër mesazhet e fjalës tuaj…

Ne kemi folur qartë. Ne duam të kthehemi në Kuvend. Ne duam të kthehemi në Parlament. Por parlamenti nuk është ndërtesë. Parlamenti nuk është një grumbull qytetarësh, njerëzish. Parlamenti është Kushtetutë, është demokraci, është debat, është dialog, është rregullore, është ligj. Të gjitha këto janë nëpërkëmbur nga asambleja e drejtuar nga çifti Rama-Meta. Ne kërkojmë rivendosjen e Parlamentit sepse vetëm me rivendosjen e Parlamentit, konceptit të parlamentarizmit, mund të ketë një pajtushmëri midis opozitës dhe Parlamentit.

Pasi ia parashtruat situatën në parlament komisionerit Fyle, a ju ftoi të ktheheni në parlament ?

Mendoj se diskutimi ka qenë fare i qartë. Nuk ka mendje të shëndoshë europianiste të mos kuptojë se kërkesat e opozitës janë në themel të identitetit europian. Çfarë kërkojmë ne? Zbatimin e Kushtetutës, zbatimin e vendimeve të Gjykatës Kushtetuese dhe një akt njohjeje, pranimi të përgjegjësie për kriminalizimin e parlamentit dhe hapat për ta dekriminalizuar parlamentin dhe administratën si parakusht për paqen sociale dhe politikën në vend.

Reforma në drejtësi është një nga prioritetet kyçe. Pritet që Presidenti i Republikës në 6 tetor të mbledhë një tryezë gjithëpërfshirëse për reformën në drejtësië. A do të prezantojë opozita një platformë të saj për këtë reformë ?

Basha: Opozita ka idetë e saj, ka projektet e saj, ka një ekspertizë të çmuar dhe të konsultuar edhe me partnerët tanë ndërkombëtarë për çështjet e reformës në drejtësi, por që të ketë reformë në drejtësi, duhet të ketë gjithpërfshirje, duhet të ketë standarde europiane, duhet të ketë pjesmarrje të të gjithë aktorëve duke përfshirë aktorë nga drejtësia, duhet të ketë transparencë dhe jo ajo që shohim tani. Nga njëra anë flitet për reformën në drejtësi, nga ana tjetër Arben Ndoka me shokë janë vërsulur të shkarkojnë dhe të kapin Këshillin e Lartë të Drejtësisë.

HermesNews - ©2014

Dërgo me email | Stampo artikullin