28/09/2014 10:14:14

Fiton Vllaznia. Zhbllokohet Sosa. Kapiteni Beqiri feston ditëlindjen

Vllaznia ka marrë tre pikë shumë të vlefshme në ndeshjen e luajtur pasditen e së shtunës ndaj Elbasanit me rezultatin 1-0

HermesNews - Vllaznia ka marrë tre pikë shumë të vlefshme në ndeshjen e luajtur pasditen e së shtunës ndaj Elbasanit me rezultatin 1-0.

Ka vendosur në këtë takim goli i uruguajanit Soza që në minutën e 22-të por nëse kuqeblutë kanë marrë tre pikë në këtë takim, duhet pranuar se ata kanë qenë me shumë fat. Në minutën e 30-të të ndeshje, elbasanasit kanë fituar një 11-metërsh të cilën e ekzekutoi Dalipi por ka qenë portieri Selimaj që e ka pritur topin.

Në pjesën e dytë pritej një përmirësim i lojës së vendasve por nuk do të ndodhte kështu, madje Çota për miqtë duhej të kishte shënuar por ka qenë përsëri Selimaj që ka shpëtuar portën e tij ashtu siç ka qenë edhe një rast në minutën e 83-të kur Vllaznia ka shpëtuar përsëri nga pësimi i golit të barazimit.

Ndërkohë, në konferencën e shtypit pas ndeshjes, trajneri Raineri mbi të gjitha është shprehur I kënaqur për pikët e marra dhe aspak për lojën e zhvilluar ndërkohë që trajneri I Elbasanit Dosti ka ndjerë keqardhje për largimin nga Shkodra pa pikë.

Me tre pikët e marra sot, Vllaznia është ngjitur në kuotën e 8 pikëve dhe nëse do të kishte patur tre pikë të zbritura në renditje, ajo do ishte në vendet e para të tabelës së klasifikimit. Kjo do të thotë se skuadra po funksionon.Fitorja e sotme ndaj Elbasanit ka qenë dhurata më e mirë që skuadra i ka bërë kapitenit Elvin Beqiri me rastin e 34 vjetorit të lindjes së tij.

Arbër Meçenovi

Dërgo me email | Stampo artikullin