24/09/2014 16:48:32

Hetimi parlamentar për anëtarët e KLDsë

Anëtarët e KLDsë, Elvis Cefa dhe Lulzim Lelcaj, në komisionin e ligjeve

TIRANË - Komisioni parlamentar i Ligjeve vendosi t’i propozojë parlamentit
ngritjen e një komisioni hetimor që do të shqyrtojë kërkesën e një grupi deputetësh për shkarkimin e dy anëtarëve të Këshillit të Lartë të Drejtësisë, Elvis Çefa, në detyrën e nënkryetarit dhe Lulzim Lelçaj në cilësinë e anëtarit. Maxhoranca, në kërkesën e saj, argumenton se dy anëtarët e zgjedhur me propozim të Kuvendit, kanë shkelur rëndë ligjin.

Komisioni hetimor do të verifikojë të dhënat, faktet dhe rrethanat për shkelje të ligjit nga anëtarët e KLD-së, që përbëjnë shkak për kërkesën për shkarkim. Komisioni do të përbëhet nga 9 anëtarë, 5 nga maxhoranca dhe 4 nga opozita.

Neni 114 i rregullores parlamentare që flet për shkarkimin e anëtarëve të organeve kushtetuese, ndër të tjera përcakton se komisioni i Ligjeve, brenda 15 ditëve i paraqet Kuvendit raportin dhe propozimin e tij për ngritjen e një komisioni hetimor.

Në rast se personi, për të cilin kërkohet shkarkimi, dëshiron të shprehet në komision, ky i fundit është i detyruar ta dëgjojë, duke i lënë një kohë të mjaftueshme për përgatitjen e mbrojtjes dhe dhënien e sqarimeve.

Sipas nenit 114, pika 2, Kuvendi zhvillon debat në seancë plenare jo më vonë se 7 ditë nga data e paraqitjes së raportit të komisionit të Ligjeve dhe në përputhje me kohën e përcaktuar nga Konferenca e Kryetarëve. Në rast se Kuvendi rrëzon nëpërmjet votimit raportin dhe propozimin e paraqitur nga ky komision, procedura për shkarkimin e anëtarit të organit kushtetues ndërpritet.

Në rast se Kuvendi pranon nëpërmjet votimit raportin dhe propozimin e komisionit, ngre brenda 2 ditëve një komision hetimor për këtë çështje. Komisioni hetimor është i detyruar të thërrasë dhe të dëgjojë mendimin e anëtarit të organit kushtetues, për të cilin kërkohet shkarkimi në lidhje me propozimin e paraqitur.

Në përfundim të hetimit, komisioni hetimor duhet t’i paraqesë Kuvendit në mënyrë të arsyetuar nëse ekzistojnë ose nuk ekzistojnë shkaqet për shkarkimin e anëtarit të organit kushtetues. Pika 3 e nenit 114 të rregullores parashikon që Kuvendi shqyrton me debat dhe voton raportin e komisionit hetimor në një seancë të veçantë brenda 20 ditëve nga paraqitja e tij.

Kërkesa e 39 deputetëve të mazhorancës, e paraqitur dje në komisionin e Ligjeve, argumenton se dy anëtarët e KLD-së, Çefa dhe Lelçaj, me veprimet dhe mosveprimet e tyre në 10 raste kanë shkelur rëndë ligjin. Dy anëtarët e KLD-së, të pranishëm në komision, u shprehën të gatshëm të përballen me hetimin parlamentar, ndërsa i konsideruan antikushtetuese argumentat e maxhorancës për shkarkimin e tyre nga detyra.

HermesNews - ©2014

Dërgo me email | Stampo artikullin