24/09/2014 15:20:17

Polonia propozon armët nukleare për t'u mbrojtur nga Rusia

Walesa: ''Polonia duhet të tregohet e vendosur përballë Rusisë. Putini kërkon të na frikësojë me armën e tij bërthamore, ndërkohë pse ne nuk duhet të kemi një arsenal të tillë ?''

VARSHAVË - Ish presidenti polak, Lech Walesa propozoi që vendi i tij të marrë hua armë bërthamore për t’iu përgjigjur kërcënimit që përbën sipas tij Rusia e Vladimir Putinit, në një intervistë të publikuar sot. “Polonia duhet të tregohet e vendosur përballë Rusisë. Putini kërkon të na frikësojë me armën e tij bërthamore, ndërkohë pse ne nuk duhet të kemi një arsenal të tillë?”, shtroi pyetjen shefi historik i sindikatës ”Solidaritet” në një artikull të të përditshmes Rzeczpospolita. “Ne do të duhej të kishim marrë hua ose me qira armë bërthamore dhe t’i tregonim Putinit se nëse një ushtar rus vendos këmbën në tokën tonë, ne do ta godasim”, pohon Lech Walesa, 70 vjeç. Për momentin nuk ekziston mundësia të marrim hua ose me qira armë bërthamore. Megjithatë, disa vende, të tilla si Belgjika, Gjermania, Holanda, Italia dhe Turqia kanë në territoret e tyre armë bërthamore ”të përbashkëta” në kuadër të NATO-s. Duke përmendur që ish-numri një komunist polak, Edward Gierek dëshironte të merrte në mënyrë të fshehtë armë bërthamore, Walesa konfirmoi se Polonia duhet të thotë me zë të lartë: ”Zoti Putin, ne nuk do t’iu lejojmë të bëni asnjë hap përpara. Nëse ju tentoni, ju do të vdisni dhe ne do të vdesim gjithashtu”, tha ai.

HermesNews - ©2014

Dërgo me email | Stampo artikullin