18/09/2014 14:30:39

Akuzohej për vrasje: esktradohet nga Londra 39 vjeçari

Gjykata e durrësit e dënon me 18 vjet për vrasje me paramendim

TIRANË - Zyra Qëndrore Kombëtare Interpol Tirana ka ekstraduar nga Londra (Britani e Madhe), drejt vendit tonë, shtetasin shqiptar Andi Idriz Bardhoshi, 39 vjeç, nga Durrësi. Sipas burimeve nga Ministria e Punëve të Brendshme, i ekstraduari ishte shpallur në kërkim ndërkombëtar, pasi Gjykata e Rrethit Gjyqësor Durrës, me vendimin Nr. 56, datë 08.03.2000, e ka dënuar këtë shtetas me 18 vjet burg në mungesë, për kryerjen e veprës penale të “Vrasjes me paramendim“ e kryer në bashkëpunim dhe armëmbajtjes pa leje. Ngjarja për të cilën ky shtetas është deklaruar fajtor nga organet e drejtësisë ka ndodhur më datë 14.09.1997, rreth orës 21:00, ku shtetasi Andi Bardhoshi në bashkëpunim me shtetasin Helidon Becka, kanë qëlluar me armë zjarri në drejtim të shtetasit Alfred H., duke e vrarë atë. Si rezultat i bashkëpunimit të Interpol Tiranës me Interpol Londrën, në datën 03.05.2012, shtetasi Andi Bardhoshi, është arrestuar në qytetin e Londrës/Britani e Madhe, me qëllim ekstradimi drejt vendit tonë. Në aeroportin “Nënë Tereza“ në Rinas, ky shtetas i është dorëzuar përfaqësuesve të Drejtorisë së Përgjithshme të Burgjeve.

HermesNews - ©2014

Dërgo me email | Stampo artikullin