15/09/2014 16:26:54

Fullani në arrest shtëpiak

Gjykata e Apelit vendosi masën e sigurisë arrest në shtëpi

TIRANË - Gjykata e Apelit vendosi masën e sigurisë arrest në shtëpi për ish-Guvernatorin e Bankës së Shqipërisë, Adrian Fullani. Apeli la në fuqi sot masën e sigurisë “Arrest me burg”, dhënë nga Gjykata e Shkallës së Parë në kryeqytet, për kryeinspektoren e BSH-së, Elivar Golemi. Trupi gjykues po shqyrton rivlerësimin e masës së sigurisë për Guvernatorin e Shqipërisë, Ardian Fullani si dhe për 4 punonjës të tjerë të Bankës së Shqipërisë.

Në seancën për rivlerësimin e masës së sigurisë ndaj kryeinspektores Elivar Golemi, prokuroria kërkoi që të mos merrej sot vendimi pasi janë shkelur afatet ligjore. Prokuroria kërkoi të qëndrojë në fuqi masa e sigurisë “arrest me burg”, pasi kryeinspektorja nuk ka kryer auditimin konform ligjit.

Avokati i Golemit ka ankimuar arrestin me burg, lidhur me akuzën për “shpërdorim detyre”. “Akuza nuk qëndron, por edhe masa e sigurisë është në shkeljen e procedurës, ndaj dhe kërkojmë ndryshimin e masës së sigurisë”, tha ai.

Sipas avokatit mbrojtës të Golemit, “lirimi i shtetases në hetim nuk cënon provat, ndërkohë që Golemi ka depozituar në Prokurori të gjitha dokumentacionet e kërkuara”.

Pasi u tërhoq për të marrë vendimin, trupa gjykuese vendosi të lërë në fuqi masën “Arrest me burg” për kryeinspektoren Elivar Golemi.

Gjithashtu, Gjykata e Apelit vendosi të lërë në arrest shtëpie punonjësin e BSH-së, Ilir Dedja, i cili akuzohet për “Shpërdorim detyre”. Prokuroria kishte kërkuar ndryshimin e masës së sigurisë nga “Arrest shtëpie” në “Arrest me burg”, por kjo kërkesë u hodh poshtë nga Apeli.

Ndërsa për kryetarin e Auditit të Brendshëm në BSH, Bahri Allushi, Gjykata e Apelit ndërroi masën e sigurisë nga “Arrest me burg” në “Arrest shtëpie”.

HermesNews - ©2014

Dërgo me email | Stampo artikullin