15/09/2014 13:00:39

Emri i guvernatorit vjen nga jashtë

Takimi i dyte; diskutohet standarti i kandidatit për guvernator në Bankën e Shqipërisë. Parlamenti mund të vendosë shpejt për shkarkimin e Fullanit

TIRANE - Ndërsa sot vendos Apeli për të lënë ose jo në burg, guvernatorin e bankës së Shqipërisë, Ardian Fullani, Kryeministri Rama dhe Presidenti Nishani, po vendosin linjat e përgjithshme mbi bazën e të cilave do të zgjidhet guvernatori i ri i insitucionit më të rëndësishëm financiar në vend. Sipas ligjit, guvernatori propozohet nga Presidenti i Republikës i cili ia çon emrin për miratim parlamentit, por Presidenti Nishani ende nuk e ka hedhur të zezën mbi të bardhë për askënd.


Rama e ka takuar atë dy herë brenda javës për të lidhur një marëveshje në parim për standartin që do të ketë kandidati. Pak ditë më parë, kryeministri bëri thirrje në fb për të gjithë shqiptarët që punojnë jashtë nëpër institucione financiare ndërkombëtare, për të aplikuar për postin vakant të guvernatorit të bankës së shqipërisë.

Konkurs ose jo, Nishani ka rënë dakord për ruajtjen e pavarësisë së bankës dhe rritjen e profesionalizmit të saj, por kjo me siguri nuk është një zgjidhje e lehtë për presidentin, i cili duhet të ruajë dy ekuilibra të rëndësishëm në vend, atë institucional dhe politik.

Doriana Metollari

Dërgo me email | Stampo artikullin