11/09/2014 19:47:03

Drejtimi i këshillit të integrimit

Gjosha e kosideron të rëndësishëm propozimin e qeverisë që Këshilli të drejtohet nga dy bashkëdrejtuese të Komisioneve Parlamentar

TIRANË - Këshilli Kombëtar i Integrimit Europian do të funksionojë dhe nëse opozita nuk merr pjesë.
Ministrja hedh poshtë spekulimet e opozitës për këtë draft të propozuar prej dikasterit që ajo drejton, ndërsa e konsideroi ngritjen e këtij Këshilli tejet të rëndësishëm në procesin e integrimit. Modeli i propozuar nga qeveria është i mirëmenduar dhe i përshtatet vecanërisht momentit në të cilin ndodhet vendi në procesin e integrimit.

Duke vënë në dukje se ky model dëshmon pjekuri politike dhe ofron nxitje për të rritur nivelin e dialogut politik mes maxhorancës dhe opozitës, Gjosha thotë se të gjitha vendet të cilat kanë ngritur këtë Këshill e kanë bërë duke iu përshtatur rrethanave, fazës së procesit të integrimit në të cilin ndodhet ky vend apo situatës politike.

Duke hedhur poshtë pretendimet e opozitës lidhur me modelin e ngritjes së këtij Këshilli, Ministrja sqaron gjithashtu se nuk ka model të kopjuar, por të përshtatur dhe nëse në Kroaci Këshillin e drejton opozita, në Kosove e drejton Presidenti, në Serbi e drejton Kryeministri.

Lidhur me drejtimin e Këshillit nga opozita, Ministrja Gjosha e kosideron të rëndësishëm propozimin e qeverisë që Këshilli të drejtohet nga dy bashkëdrejtuese të Komisioneve Parlamentare.

"Ky Këshill nuk mund të cilësohet thjesht si një strukturë qeveritare apo parlamentare, sepse në momentin kur do të hapen negociatat, të gjithë aktorët duhet të jenë pjesë e Këshillit me gjithë angazhimin e tyre duke bërë më të mirën e mundshme për të vendosur procesin e integrimit mbi çdo interes tjetër", deklaron ajo.

Në përfundim, ministrja e Integrimit nënvizon se opozita duhet të jetë pjesë e Këshillit dhe të japë kontributin e saj në procesin e integrimit europian për të ngritur një organ transparent që ti shërbejë avancimit të vendit drejt BE-së.

HermesNews - ©2014

Dërgo me email | Stampo artikullin