05/09/2014 16:38:19

Bashkëpunim kundër terrorizmit

Dy ministrat nënshkruan sot Protokollin e Bashkëpunimit ndërmjet Republikës së Shqipërisë dhe Maqedonisë

TIRANE - Ministri i Punëve të Brendshme Saimir Tahiri priti Ministren e Punëve të Brendshme të Republikës së Maqedonisë Gordana Jankulovska. Pas nënshkrimit të Protokollit ndërmjet dy vendeve për bashkëpunimin policor në sezonet e verës për të ushtruar kontrolle të përbashkëta, 2 ministrat theksuan domosdoshmërinë e thellimit të bashkëpunimit në luftën kundër krimit të organizuar, por edhe terrorizmit fetar e etnik.

"Duke ndarë bindjen e përbashkët se krimi nuk njeh kufi, ne ndamë edhe vlerësimin e përbashkët për të intensifikuar bashkëpunimin ndërmjet dy vendeve dhe ndërmjet dy institucioneve, duke përcaktuar gjithashtu, që një grup i përbashkët pune, me teknicienë, ndërmjet dy policive, do të marrë shqyrtimin dhe identifikimin e çështjeve prioritare dhe adresimin e zgjidhjeve për të bashkëpunuar në mënyrë intensive në kuadër të luftës së përbashkët", tha Tahiri në një konferencë për shtyp.

Dy ministrat nënshkruan sot Protokollin e Bashkëpunimit ndërmjet Republikës së Shqipërisë dhe Maqedonisë. Protokolli përfshin bashkëpunimin policor në periudhën e sezonit turistik, duke bërë të mundur që punonjës të policisë së Maqedonisë të krijojnë patrulla të përbashkëta me punonjësit e policisë shqiptare në akset rrugore.

Do të ngrihen grupe operative bashkëpunimi ndërmjet dy ministrive, në nivel rajonal, ku do të ketë shkëmbim informacioni, si dhe do të mundësojnë luftën kundër krimit të organizuar dhe për t’u përballur më konkretisht me këto sfida.

Po ashtu, para pak kohësh, në Republikën e Maqedonisë janë bërë ndryshime në Kodin Penal për të gjithë ata që marrin pjesë në grupe paraushtarake, si dhe pjesëmarrësit në grupe terroriste dhe mendoj se në këtë aspekt, me këtë Kod Penal, do të parandalohen të gjitha këto raste të kësaj natyre.

HermesNews - ©2014

Dërgo me email | Stampo artikullin