03/09/2014 15:49:23

Pranga asistentës së bankës

Akuza për shpërdorim detyre

TIRANË - Seksioni për krimin ekonomik e financiar në Policinë e Tiranës ndaloi dje një punonjëse të një banke të nivelit të dytë, ndërsa nisi procedimin penal në gjendje të lirë për drejtorin e degës së kësaj banke, si dhe shpalli në kërkim arkëtarin e bankës, që dyshohet se ka kryer vjedhjen. Në një njoftim për shtyp të Policisë së Tiranës bëhet e ditur se ” ditën e djeshme u bë ndalimi me inisiativë i shtetases Brunilda Samil Dura, 38 vjeç, banuese në Tiranë, e dyshuar për veprën penale shpërdorim detyre, si dhe filloi procedimi penal në gjendje të lirë për shtetasin F.Z., 56 vjeç, banues në Tiranë, i dyshuar për veprën penale shpërdorim detyre. Gjithashtu, u bë shpallja në kërkim dhe punohet për shoqërimin e shtetasit Besmir Fahri Laja, 29 vjeç, banues në Tiranë, i dyshuar për veprën penale “vjedhje përmes shpërdorimit të detyrës”. Sipas policisë nga hetimet e kryera, shtetasi Besmir Laja, punonjës i një banke të nivelit të dytë, arkëtar, dyshohet se ka vjedhur në këtë bankë, duke shpërdorur detyrën, shumat prej: 7.280.012 lekë, 32.900 euro dhe 18.080 dollarë amerikan nga arka e bankës, si dhe 510.000 lekë nga ATM. Ndërkohë shtetësja Brunilda Dura, me detyrë Asistente/Shefe operacionale pranë kësaj banke dhe shtetasi F.Z., me detyrë drejtor dege, dyshohen se përmes shpërdorimit të detyrës kanë lejuar që shtetasi Besmir Laja të kryente vjedhjen.

HermesNews - ©2014

Dërgo me email | Stampo artikullin