03/09/2014 12:58:38

Inspektorja e BSH refuzon dëgjimin para komisionit

Kreu i Komisionit parlamentar sqaron se nga raportet del qartë se departamenti i kontrollit varet drejtpërdrejt nga Inspektori i BSH-së

TIRANE - Inspektorja e Përgjithshme në Bankën e Shqipërisë refuzoi vetëm 30 minuta para se të niste mbledhja e Komisionit të Ekonomisë, kërkesën e kryetarit Erjon Braçe për një seancë dëgjimore publike në lidhje me skandalin e vjedhjes së 713 milionë lekëve nga Thesari i Shtetit.

Kryetari i Komisionit Braçe theksoi në fjalën e tij para deputetëve se refuzimi i Inspektores është një akt i rëndë, i paprecedentë dhe i pa ndodhur në 23 vitet e fundit.

Komisioni ka në dispozicion raportet e Inspektorit të Përgjithshëm të BSH-së, që nga viti 2010 dhe kupton se cila ka qënë arsyeja që ka detyruar inspektoren e Përgjithshme të mos paraqitet në Kuvend.

"E para, pengesa për të kryer detyrën në mënyrë të plotë dhe ligjore brenda Bankës së Shqipërisë dhe e dyta, mos përmbushja e rregullt e detyrës prej Inspektores", tha Braçe.

Kreu i Komisionit parlamentar sqaroi se nga raportet del qartë se departamenti i kontrollit që varet drejtpërdrejt nga Inspektori i BSH-së, ka edhe një varësi të dytë drejtpërdrejt nga Guvernatori i BSH-së, ashtu siç del qartë se roli kushtetues dhe i pavarur i Inspektorit është cënuar rëndë vit për vit në ushtrim të detyrës së tij dhe është vënë në varësi institucionale të burimeve njerëzore dhe të financave nga Guvernatori i BSH-së dhe për më keq akoma është penguar të kryej detyrën e tij.

"Nga pikpamja e burimeve njerëzore në vite, institucioni apo departament i kontrollit që drejtohet drejtpërdrejt nga Inspektori i BSH-së, jo vetëm nuk ka numrin e domosdoshëm të punonjësve, por nga ana tjetër rekomandimet e tij, ose janë refuzuar ose marrë parasysh pjesërisht, ose janë zbatuar në më pak se 57 % të tyre", deklaroi z. Braçe.

"Në njërën anë kemi veprime të qarta të qëllimshme të evidentuara edhe nga institucione të tjera ndërkombëtare shumë të rëndësishme si FMN, ndaj kontrollit të brendshëm dhe Inspektorit të Përgjithshëm të BSH-së dhe mos përmbushje të qartë të detyrës së Inspektores", ndaj vijoi Braçe, "kërkuam të ndanim sot në një seancë dëgjimore publike dhe për secilën nga çështjet që vet Inspektorja ka ngritur në raportet zyrtare të dërguara në Këshillin Mbikqyrës, që më lejoni të them se nuk ka asnjë gjurmë që Këshilli të ketë reflektuar mbi problematikën e ngritur nga inspektori".

Duke vënë theksin në faktin se Kuvendit të Shqipërtisë i janë fshehur nga ana e BSH-së për 14 vite me radhë raportet e Inspektorit, Braçe tha se kulmi ndodh kur Inspektorja refuzon t’i përgjigjet Kuvendit.


Komisoni i Ekonomisë ka vijuar mbledhjen me dyer të mbyllura.

HermesNews - ©2014

Dërgo me email | Stampo artikullin