29/08/2014 08:41:07

Barroso, mund t'ju japim fonde dhe hua nga mjetet financiare

Presidenti i KEsë tha se janë parashikuar €12 miliardë deri në vitin 2020. ''Duhet të ketë edhe hua nga Banka Europiane e Investimeve që është aktive në rajon, gjithashtu edhe BERZH-i që është aktiv dhe institucione të tjera financiare ndërkombëtare''

BERLIN - Mënyra për të ruajtur stabilitetin e Bashkimit Europian është anëtarësimi i vendeve ballkanike. "Duam t’i shohim vendet e Ballkanit Perëndimor së fundmi, të jenë anëtarë të Bashkimit Europian", tha Presidenti i Komisionit Europian Jose Manuel Barroso.

"Komisioni i mbështet vendet e Ballkanit Perëndimor në udhën e tyre drejt Bashkimit Europian. Forcimi i sundimit të ligjit, shteti i së drejtës, përmirësimi i situatës ekonomike janë thelbësore në këtë këndvështrim," vijon. .

Me rëndësi për këtë është tejkalimi i pengesave ekzistuese në rajon, si rrjedhojë e një bashkëpunimi të munguar rajonal, deri tani. "Ka shumë hallka që mungojnë përsa i përket rrugëve, rrjeteve hekurudhore apo rrjeteve energjetike. Ka rëndësi thelbësore, për rrjedhojë, që vendet e Ballkanit Perëndimor, me mbështetje të fortë ndërkombëtare europiane të kenë një bashkërendim të fortë mes tyre dhe me Bashkimin Europian, për të shpejtuar investimet".

Instrumentet e paraanëtarësimti janë një mjet efikas për marrjen e fondeve të këtyre projekteve.

Nuk do të ketë vetëm grante, duhet të ketë edhe hua nga Banka Europiane e Investimeve që është aktive në rajon, gjithashtu edhe BERZH-i që është aktiv dhe institucione të tjera financiare ndërkombëtare.

Barroso tha se përtej infrastrukturës, duhet të vihen në kontakt me njeri - tjetrin dhe njerëzit apo të rinjtë, apo trajnimi i njerëzve që nga gjyqtarët, prokurorët, oficerët e policisë.

Bashkimi Europian do të luajë rolin e vet udhëheqës nëpërmjet ndihmës së vet dhe të mbështetjes nëpërmjet instrumentit të paraanëtarësimit, me një shumë prej 12 miliardë euro, parashikuar për periudhën 2014-2020.

20% e këtij financimi do të shënjestrojë projekte rajonale, "ne i kemi mbajtur angazhimet tona financiare në nivele të larta, edhe në kohë të një krize financiare në Europë, është një dëshmi e mirë e përkushtimit të Bashkimit Europain dhe shteteve anëtare, për këtë rajon", përfundon Presidenti i KEsë, i pranishëm në samitin e ballkanit në Berlin.

HermesNews - ©2014

Dërgo me email | Stampo artikullin