23/08/2014 19:04:41

Didi në Shkodër. Do t'u kundërpërgjigjemi armëve

''Policia do të kundërpërgigjet nëse do të ketë të shtëna me armë në drejtim të saj''

SHKODER - Rreth 46 mijë rrënjë bimë narkotike janë asgjësuar deri tani në kuadër të operacionit antidrogë që po ndërmarrin strukturat e Policisë së Shtetit në komunat e zonës së Dukagjinit, përkatësisht Shllak, Shosh, Pult dhe Temal.

Në një prononcim për mediat nga Shkodra, Drejtori i Përgjithshëm i Policisë së Shtetit, Artan Didi, evidentoi ecurinë e deritanishme të operacionit, si dhe theksoi vendosmërinë për vazhdimësinë e tij deri në asgjësimin e çdo sipërfaqe të kultivuar me bimë narkotike.

“Kemi realizuar pjesën më të madhe të asgjësimit të bimëve narkotike në ato zona që i kemi pasur prioritare, pasi kanë qenë zonat me më tepër kultivim. Në ditët në vazhdim do të vazhdojmë në komuna të tjera të zonës së Dukagjinit dhe do të qëndrojmë atje deri në rrënjën e fundit”, tha Didi.

Sipas tij, nuk ka ende persona të arrestuar, por ka persona të dyshuar ndaj të cilëve ka filluar procedimi policor dhe në bashkëpunim me Prokurorinë do të fillojë dhe procedimi penal.

Ndërkohë Didi u shpreh se “policia do të kundërpërgigjet nëse do të ketë të shtëna me armë në drejtim të saj”. Në terren gjatë ditës së sotme, janë angazhuar rreth 200 forca policore të Drejtorisë së Përgjithshme të Policisë së Shtetit, Drejtorisë së Policisë Qarkut Shkodër, të Komisariatit Special RENEA, Ndërhyrjes së Shpejtë dhe shërbime të tjera të specializuara, si oficerë të policisë gjyqësore dhe ekspertë kriminalistë.

Veprimet e strukturave policore drejtohen dhe koordinohen nga drejtues të Drejtorisë së Përgjithshme të Policisë së Shtetit.

HermesNews - ©2014

Dërgo me email | Stampo artikullin