23/08/2014 18:31:06

Proçedime penale për krerët lokal ? Tahiri, një ligj për të gjithë

''Gjithçka do të jetë sipas ligjit dhe askush nuk do t’i shmanget përgjegjësisë ligjore''

TIRANE - Ministri i Brendshëm Saimir Tahiri tha sot se, policia është e vendosur ti shkojë deri në fund aksionit antidrogë në Shkodër. Pas një takimi me drejtues të policisë në Shkodër, Tahiri e cilësoi aksionin antidrogë në veri, si aksionin më të madh pas Lazaratit.

Ministri i i bëri apel personave që qëllojnë me armë ndaj efektivëve të policisë që të dorëzohen, pasi askush nuk mund t’i bëjë bisht përgjegjësisë penale. "Ky është aksioni i dytë më i madh pas Lazaratit, ku policia ka zhvilluar një punë të shkëlqyer. Ata që kanë qëlluar policinë të dorëzohen, pasi jemi të vendosur ta përfundojmë me sukses këtë aksion. Askush nuk mund t’i bëjë bisht përgjegjësisë penale", tha Tahiri.

I pyetur nëse do të ketë procedime penale ndaj drejtuesve vendorë që nuk kanë kryer detyrën për t’i denoncuar këto parcela, Tahiri tha se “gjithçka do të jetë sipas ligjit dhe askush nuk do t’i shmanget përgjegjësisë ligjore”.

Operacioni antidrogë në zonën e Dukagjinit, i konsideruar si operacioni më i madh pas atij në Lazarat, ka hyrë sot në ditën e tretë.

Ndërkohë një grup personash e kanë pritur me të shtëna armësh operacionin antidrogë të policisë në Shkodër. Burime nga policia bëjnë me dije se të shtënat me armë ndaj efektivëve që marrin pjesë në operacion kanë ndodhur në komunën Pult.

HermesNews - ©2014

Dërgo me email | Stampo artikullin