21/08/2014 17:31:46

Pse nuk i kërkoj dorëheqje Fullanit ?

Konferencë për shtyp e Kreut të Qeverisë Edi Rama Kryeministri ka folur për herë të parë për vjedhjen e Bankës së Shqipërisë

TIRANË - Qytetarët shqiptarë do të kenë rrugë të reja, sapo të shlyhen borxhet e firmave ndërtuese. Një sfidë me firmat vendase, të cilat ende duhet të marrin borxhet e prapambetura. Kryeministri Rama i parapriu idesë së financimeve të reja dhe pagesës së borxheve të prapambetura nga "qeveria tjetër" dhe për këtë, "duhet të gjejmë dhe një mirëkuptim me FMN-në që s’do të jetë e lehtë", pohoi Rama në një konferencë për shtyp live në Facebook. Të hënën do të mbahet një takim rajonal me kryeministrat e Malit të Zi, Kroacisë dhe Bosnjës për të përfunduar një marrëveshje për Korridorin e Kaltër. Praktikisht është aksi që do të përfshijë pjesën jugore të Kroacisë, Malin e Zi dhe Shqipërisë. Një projekt shumë i rëndësishëm, i cili përmbedh akset e prapambetura të shteteve në një të vetëm. Përfundimi i marëveshjes do të paraqitet në Berlin.

Nga rrugët tek harta.

Ndarja e re ka sjellë prioritete me të cilat vendi nuk është përplasur më parë, një ndër këto dhe shpërndarja e fondeve që do të vihet në dispozicion të përmirësimit të cilësisë së jetës në zonat periferike të vendit.

Nota pozitive për Ministrinë e Brendshme dhe Policinë.

Rama tha se këtë vit ka patur 30% më pak vrasje se një vit më parë: 75% vjedhje me dhunë më pak se një vit më parë: 22% aksidente më pak. 30% më pak të plagosur rëndë në aksidentet rrugore. Vetëm për këtë sezon turistik në terren u angazhuan mbi 2800 forca policie por për turizmin është prioritare dhe zgjidhja e problemit të kanalizimit të ujërave të zeza. Kjo përfshihet brenda një plani kombëtar që do të hyjë ne nje fazë të re.

Këtë verë për herë të parë pati proçedime penale për subjektet që kanë prishur qetësinë jashtë orareve të lejuar për muzikë.

Mjedisi.

"Jemi përballë një barbarie të pashembullt me asgjë ne rajon", tha Rama, i cili foli për forcimin e masave kundër dëmtimit të ambjentit.

Kamerat e sigurisë.

Së shpejti finalizohet një projekt i ri për të rritur sigurinë në rrugë dhe për të luftuar korrupsionin e policisë rrugore.

66 milionë lekë janë bërë investime në sektorin energjitik, kryesisht për remonte të stacioneve të rrjeteve shpërndarëse dhe numri i remonteve ka qenë thuajse 100 % më i lartë se një vit më parë, megjithatë duhet të luftohet vjedhja e energjisë elektrike.

Qeveria po përgatit një projekt të shërbimeve publike, një model tërësisht tranformues. "Kemi të gjitha arësyet për të besuar se këto do të jenë katër vitet që do të transformojmë vendin dhe europianizojmë shtetin", tha Rama.

Kryeministri ka folur për herë të parë për vjedhjen e Bankës së Shqipërisë.

"Banka Qendrore është një institucion i pavarur. Qeveria nuk ka heshtur për këtë ngjarje, por duhet ta kuptoni se ka një ndryshim të rëndësishëm mes qeverisë dhe shoqërisë civile, pasi rolet dhe përgjegjësitë janë të ndryshme", tha Rama që i kërkoi prokuorisë, "që t’i shkojë deri në fund hetimit, por jo në rrugën tradicionale të hetimeve që nuk përfundojnë asnjëherë, por të hetimeve intensive, gjithëpërfshirëse dhe shteruese, për të nxjerrë çdo përgjegjësi", tha Rama.

"Kjo është një sfidë e madhe për autoritetin dhe sigurinë e Bankës, që dua t’ua them qartë e prerë se është një institucion i pavarur. Pse nuk i kërkoj dorëheqjen kryetarit të Gjykatës Kushtetuese, të Gjykatës së Lartë apo asaj të Apelit, mund të kem shumë arësye mes njërit apo tjetrit, por si kryeministër nuk mund t’i kërkoj dorëheqjen drejtuesit të një institucioni të pavarur", tha Kryeministri.

Në konferencën e sotme për shtyp kryeministri iu përgjigj gazatarëve dhe për reformën në drejtësi. "Sa i takon antikorrrupsionit, ne do të hyjmë në një fazë të re, bazuar në sukseset e vendeve të tjera, por do të veprojmë intensivisht në të gjithë sektorët, pa bërë dallime", tha ai

Në fund dhe hapje ndaj opozitës.

"Ne nuk mendojmë se korrupsioni është identifikuar me Partinë Demokratike dhe qeverinë e kaluar dhe se gjithçka i takon atyre. Ne mendojmë se korrupsioni është një sëmundje aktive në shoqërinë tonë dhe që prek kudo ku sistemi nuk garanton transparencë dhe efektivitet", tha Rama.

HermesNews - ©2014

Dërgo me email | Stampo artikullin